June 2021

मुंबई - लॉकडाऊन आणि कोरोना संकटात आता मुंबईकरांच्या खिशाला कात्री लागणार आहे. कारण मुंबई महापालिका २०१४ नंतरच्या सर्व इमारतींकडून अग्निसुरक्षा शुल्क आकारणार आहे. एकीकडे कोरोना संकटाचे कारण देत महापालिकेने मालमत्ता कर आणि पाणीपट्टी करवाढ न करण्याचा निर्णय घेतला आहे. मात्र दुसरीकडे अग्निसुरक्षेचे कारण देत, सरसकट इमारतींना शुल्क लावले जाणार आहे. त्यामुळे मुंबई महापालिकेने आवळा देऊन, कोहळा काढला अशी प्रतिक्रिया आता विरोधक देत आहेत. दरम्यान, २०१४ नंतरच्या सर्व इमारतींकडून १० ते १५ रुपये प्रति चौरस मीटर दराप्रमाणे अग्निसुरक्षा शुल्क आकारले जाणार आहे. कोरोना संकटाचा हवाला देत मालमत्ता कर,पाणी पट्टीतील वाढ याला मुंबई महापालिकेतील सत्ताधारी आणि विरोधी पक्षाने विरोध केला. त्यामुळे करवाढीचा बोजा मुंबईकरांवर पडला नाही. त्यामुळे मुंबईकरांना दिलासा मिळाला असतानाच आता अग्निसुरक्षा शुल्क आकारण्याचा निर्णय पालिका प्रशासनाने घेतला आहे.ताबा प्रमाणपत्र देताना विकासकाकडून हे शुल्क एकदाच घेतले जाणार. मात्र याला भाजप आणि काँग्रेसने विरोध केला आहे. सत्ताधाऱ्यांचा प्रशासनावर वचक नाही का असा सवाल मुंबई महापालिकेतील काँग्रेस नगरसेवक आणि विरोधी पक्षनेते रवी राजा यांनी विचारला आहे.

महत्त्वाचे म्हणजे ३ मार्च २०१४ नंतरच्या सर्व इमारतींकडून पूर्वलक्षी प्रभावाने अग्निसुरक्षा शुल्क वसूल केले जाणार आहे. रहिवासी क्षेत्रफळ, रहिवासी इमारती, हॉटेल, व्यावसायिक आस्थापने, एकूण क्षेत्रफळ यानुसार हे शुल्क घेतले जाणार आहे.गेल्या काही दिवसांपासून मुंबईकरांच्या डोक्यावर मालमत्ता करवाढीची असलेली टांगती तलवार अखेर दूर झाली आहे. मालमत्ता करात (Property Tax) १४ टक्के दरवाढ प्रस्तावित होती. मात्र, ही दरवाढ गेल्या आठवड्यात अखेर रद्द करण्यात आली. स्थायी समितीच्या बैठकीत मालमत्ता कराच्या दरवाढीचा प्रस्ताव मांडण्यात आल्यानंतर सर्वपक्षीय नगरसेवकांनी तो फेटाळून लावला.

मुंबई - एटीएम क्लोन करून लाखो रुपयांची चोरी करीत असत असलेल्या दोन विदेशी नागरिकांना मुंबई उत्तर विभाग सायबर पोलिसांनी अटक केली आहे. दोन विदेशी नागरिक एटीएम क्लोनिंगच्या सहाय्याने एटीएमचा डाटा चोरी करत होते व त्या डाटाच्या माध्यमातून नागरिकांचे पैसे एटीमच्या माध्यमातून काढत होते. या माध्यमातून त्यांनी आतापर्यंत अनेक नागरिकांना लाखो रुपयांना गंडा घातला आहे.

मुंबईत विदेशी नागरिकांकडून भारतीय नागरिकांची लूट करणाऱ्या टोळीस मुंबई उत्तर विभाग सायबर पोलिसांनी सापळा रचून अटक केली. या आरोपीची नावे मियु आयोनिल रुचिनल ४८ वर्ष, बुदाई रोमाना वय ३६ वर्ष या विदेशी नागरिकांना अटक केली. ही दोघेही मुंबईतील विविध ठिकाणच्या एटीएम क्लोनिगच्या सहाय्याने एटीएमचा डाटा चोरी करून नागरिकांच्या बँकेतील पैसे एटीएमच्या माध्यमातून काढत असल्याचा प्रकार समोर आला आहे. या आरोपी कडून आतापर्यंत ८ लाख रुपये जप्त करण्यात आले. या संपूर्ण रॅकेट मध्ये विदेशी नागरिक क्लोनिगसाठी मायक्रो कॅमेरा आणि मॅग्नेटिक चिप व इतर साहित्याचा वापर करत असल्याचे आढळून आले. एटीएम क्लोनिग करण्यासाठी वापरण्यात आलेले एटीएम क्लोनिंग मशीन, कॅमेरा, चिप, मोबाईल, कार असे सर्व साहित्य देखील जप्त करण्यात आले आहे. तसेच त्यांना अटक देखील करण्यात आली आहे. आता नागरिकांनी एटीएममध्ये पैसे काढताना पुरेशी काळजी आणि सावधानता बाळगणे गरजेचे आहे. आपण देखील एटीएममध्ये प्रवेश केल्यावर अशा प्रकारचे साहित्य लावले आहे की नाही. हे पाहणे गरजेचे असल्याचे मत सायबर पोलिसांनी व्यक्त केले आहे.

बंगळुरू - कोरोनाच्या काळात आर्थिक समस्यांना अनेकजण सामोरे जात आहेत. अशातच कर्जबाजारीपणाला कंटाळून एकाच कुटुंबातील सहा जणांनी तलावात उडी मारून आत्महत्या केली आहे. ही घटना यादगिरी जिल्ह्यातील शहरापूर तालुक्यात डोरानहळ्ळी येथे घटना घडली आहे.भीमार्या सुरपुरा (४५) व त्यांची पत्नी शांताम्मा (३६), मुले सुमित्री (१२), लक्ष्मी आणि शिवराज अशी मृतांची नावे आहेत. शहापूर पोलिसांनी घटनास्थळी भेट देऊन पंचनामा केला आहे. तलावातून चौघांचे मृतदेह बाहेर काढण्यात आले आहेत. हे कुटुंब कर्जाच्या अडचणींना सामोरे जात होते. त्यामुळे त्यांनी आत्महत्या केल्याचे बोलले जात आहे.कोरोनाच्या भीतीने आंध्र प्रदेशमध्ये एकाच परिवारातील चौघांनी विष प्राशन करून आत्महत्या केल्याची धक्कादायक बाब २३ जूनला समोर आली होती. ही घटना आंध्र प्रदेशच्या कुरनूल वड्डेगेरी परिसरात घडली आहे. मृतांच्या घरात एक सुसाईट नोट मिळाली आहे. त्यामध्ये त्यांनी लिहले आहे की, त्यांच्या जवळच्या नातेवाईक आणि मित्राचे कोरोनामुळे निधन झाले. यामुळे आम्ही तणावात होतो. आम्हाला देखील कोरोना होईल अशी भीती आम्हाला होती.

श्रीनगर - जम्मू काश्मीरमध्ये सुरक्षा जवानांना यश मिळाले आहे. श्रीनगरच्या मलूरा पारींपोरा भागात धूमश्चक्री सुरु होती. त्यात जवानांनी लष्कर ए तैय्यबाचा टॉपचा कमांडर नदीम अबरार याला यमसदनी पाठवले. त्याबरोबरच इतर दोन अतिरेक्यांनाही ठार मारण्यात आले आहे. याच एन्काऊंटरमध्ये CRPFच्या एका अधिकाऱ्यासह दोन जवानही जखमी झाले. अधिकाऱ्यांनी दिलेल्या माहितीनुसार, श्रीनगर बारामुल्ला सीमेवर झालेल्या अनेक हत्या आणि दशहतवादी कारवायांमध्ये अबरारचा सहभाग होता. जम्मू काश्मीरचे IGP विजयकुमार यांनी सांगितले की, काही दहशतवादी हायवेवर हल्ला करणार आहेत अशी माहिती आली होती. त्याच पार्श्वभूमीवर हायवेवर जम्मू काश्मीर पोलीस आणि सीआरपीएफने नाकेबंदी केली. पारींपोर नाक्यावर एक गाडी अडवली आणि त्यांना ओळख विचारली गेली. त्याच वेळेस गाडीच्या मागच्या सीटवर बसलेल्या तसच मास्क घातलेल्या व्यक्तीने स्वत:ची बॅग उघडण्याचा प्रयत्न केला आणि ग्रेनेड काढला. त्याच वेळेस नाक्यावरच्या टीमने त्या व्यक्तीला तात्काळ पकडले.ताब्यात घेण्यात आलेल्या गाडीचा ड्रायव्हर आणि मागच्या सीटवर बसलेल्या व्यक्तीला पोलीस ठाण्यात आणले गेले. तिथे आल्यानंतर त्याच्या चेहऱ्यावरचा मास्क काढला गेला तर तो लष्कर ए तैय्यबाचा टॉपचा कमांडर अबरार होता. त्याला मग जेकेपी, CRPF आणि सैन्याच्या संयुक्त टीमने चौकशीसाठी ताब्यात घेतले आणि इंटरोगेशन सुरु केले. त्याच चौकशीत त्याने सांगितलं की, मलुरातल्या एका घरात त्याने Ak-47 रायफल ठेवलेली आहे.अबरारच्याच माहितीवर सुरक्षा जवानांनी मलूरच्या त्या घराची, भागाची नाकाबंदी केली. अबरारलाही त्या घरात नेण्यात आले. त्यावेळेस त्या घरात लपून बसलेल्या अबरारच्याच एका साथीदार दहशतवाद्याने जवानांवर गोळीबार सुरु केला. अबरारने मात्र सुरक्षा जवानांना ही माहिती दिली नव्हती. त्यामुळे जवानांसोबत धोका झाला. सुरुवातीच्या चकमकीत सीआरपीएफचे ३ जवान जखमी झाले. तर त्याच चकमकीत नदीम अबरारसोबतही चकमक झाली. जखमी जवानांना बाहेर काढले नंतर नव्या टीमने चकमकीची जबाबदारी सांभाळली. जेकेपी, सीआरपीएफने पुन्हा त्या घराची एकदम कडक नाकेबंदी केली. नंतर झालेल्या फायरिंगमध्ये पाकिस्तानी दहशतवादी मारला गेला. तसच त्याच फायरींगमध्ये नदीम अबरारही ठार झाला. घटनास्थळावरुन दोन AK-47 रायफल आणि दारुगोळा जप्त करण्यात आला. अजूनही त्या भागात सर्च ऑपरेशन सुरुच आहे.

मुंबई - डेल्टा प्लस विषाणूचा धोका आणि कोरोनाच्या तिसऱ्या लाटेच्या शक्यतेमुळे राज्यात सोमवारपासून पुन्हा एकदा कडक निर्बंध लागू झाले आहेत. या निर्बंधामुळे व्यापारी वर्गाचे मोठ्या प्रमाणात नुकसान होत आहे. त्यामुळे त्यांच्यामध्ये सरकार विरोधात नाराजीचा सूर पाहायला मिळत आहे.मुंबई आणि मुंबई उपनगरासह आसपासच्या परिसरामध्ये तिसऱ्या स्तरांमध्ये कडक निर्बंध लागू करण्यात आलेले आहे. "ब्रेक द चैन" अंतर्गत लागू करण्यात आलेल्या निर्बंधांमध्ये पुन्हा एकदा वाढ करताना जमाव व मेळावे, धार्मिक स्थळ, खासगी प्रशिक्षण वर्ग, कौशल्य केंद्र, हॉटेल आणि पर्यटन स्थळासंदर्भात काही क्षेत्रांचे स्पष्टीकरण देण्यात आले आहे. महाराष्ट्रात अनलॉक केल्यानंतर काही शहरांमध्ये पुन्हा कोरोना बाधितांची संख्या वाढू लागली आहे. याशिवाय कोरोनाच्या डेल्टा प्लस विषाणूचा यावेळी धोका देखील वाढताना दिसत आहे. यामुळे प्रशासन आणि सरकार पुन्हा एकदा बॅकफूटवर आले आहे. या पार्श्वभूमीवर महाराष्ट्रात पुन्हा निर्बंध लावण्यात आले आहेत. या दरम्यान जीवनावश्यक वस्तूंची दुकाने उघडण्यास परवानगी देण्यात आली आहे. पण व्यापारी संघटना मात्र आक्रमक झाल्याचे पाहायला मिळत आहेत.रिटेल ट्रेडर वेल्फेअर असोसिएशनचे अध्यक्ष वीरेन शहा यांनी या नवीन निर्बंधासंदर्भात आपली नाराजी व्यक्त केली आहे. त्यांनी असे सांगितले की, या निर्बंधांमुळे व्यवसायाला खूप त्रास होणार आहे. यामुळे ई-कॉमर्स कंपन्यांना मोठ्या प्रमाणात फायदा होणार आहे. अशा प्रकाराच्या निर्णयामुळे महाराष्ट्रातील व्यवसायाचे फार मोठ्या प्रमाणात नुकसान होणार आहे. कारण अनेक दुकानांना ओवरहेड, देखभाल शुल्क, पगार वाढ, वेतन, अतिरिक्त खर्च असे अनेक सारे खर्च आहेत. या निर्बंधामुळे हे खर्च पुन्हा भरून काढता येत नसल्यामुळे व्यावसायिक मात्र डबघाईला जाणार आहेत. अशी प्रतिक्रिया त्यांनी दिली. 

मुंबई - ओबीसी आरक्षणाच्या नागपुरातील आंदोलना दरम्यान विरोधी पक्षनेते देवेंद्र फडणवीस यांनी 'आमच्या हाती सूत्र द्या, मी ओबीसींचे आरक्षण परत आणून दाखवतो आणि जर असे करून दाखवले नाही तर राजकीय संन्यास घेईल' अशी जाहीर ग्वाही दिली आहे. त्यावरून आता शिवसेनेचे नेते खासदार संजय राऊत यांनी फडणवीस यांच्या उपरोधिक निशाणा साधत आम्ही त्यांना राजकारणातून सन्यास घेऊ देणार नसल्याचे म्हटले आहे.

सर्वोच्च न्यायालयाने ओबीसीचे राजकीय आरक्षण संपुष्टात आणले. त्यानंतर राज्यात सध्या ओबीसीच्या राजकीय आरक्षणावरून आरोप प्रत्यारोपांच्या फैरी झडत आहेत. आरक्षणाच्या मुद्द्यावरून ओबीसी समाजासह विरोधी पक्ष भाजपा देखील सरकारच्या विरोधात आक्रमक झाले. याच पार्श्वभूमीवर भाजपाच्या वतीने २६ जूनला राज्यभरात चक्का जाम आंदोलन करण्यात आले. त्यावेळी विधानसभेचे विरोधीपक्ष नेते देवेंद्र फडणवीस यांनी आरक्षणाच्या मुद्द्यावरून आमच्या हाती सत्ता दिल्यास तीन महिन्यात आरक्षण मिळवून देतो, आणि तसे नाही झाल्यास राजकीय सन्यास घेतो असे आवाहन केले होते. त्यावरून शिवसेनेने मुखपत्र सामानातूनही फडणवीस यांच्यावर निशाणा साधला आहे. तर संजय राऊत यांनी राज्याला फडणवीस यांची गरज असल्याचे मत व्यक्त करत उपरोधिक टीका केली आहे.संजय राऊत म्हणाले की, देवंद्र फडणवीसांना आम्ही सन्यास घेऊ देणार नाही. राज्याला त्यांची गरज आहे. त्यांची वीरक्तीची भाषा हा महाराष्ट्रावर अन्याय होईल. चांगल्या नेतृत्त्वाचा राजकारणात तुटवडा आहे. देवेंद्र फडणवीसांसारख्या हरहुन्नरी नेत्यांना फकीर होण्याची भाषा योग्य नाही. फडणवीस लढवय्ये नेते आहेत. त्यांनी मुख्यमंत्र्यांना सहकार्य करावे, संन्यास वगैरे घेण्याची भाषा करु नये, त्यासाठी मी त्यांना स्वत: भेटून सांगेन, असेही संजय राऊत यांनी सांगितले. तर ओबीसी आरक्षण प्रश्नी सर्वकाही सुरळीत व त्यांच्या मनाप्रमाणे होईल. त्यामुळे त्यांचे दुष्मन संन्यास घेतील त्यांना सन्यास घेण्याची गरज नाही राज्याला त्यांची गरज असल्याचा उपरोधिक टोलाही राऊत यांनी सामनातून लगावला आहे.

श्रीनगर - जम्मूमध्ये ड्रोन हल्ला घटनेच्या २४ तासांच्या आतच दहशतवाद्यांनी काश्मीरच्या पुलवामा येथे एका माजी विशेष पोलीस अधिकारी (एसपीओ) फैयाज अहमद यांना गोळ्या घालून ठार केले. पुलवामामधील अवंतीपोरा येथील हरिपरिगम गावात ही घटना घडली. दहशतवाद्यांनी एसपीओ फैयाज अहमद यांच्या घरात घुसून अंदाधुंद गोळीबार केला. या दहशतवादी कारवाईत फैयाजचा जागीच मृत्यू झाला आणि त्यांची पत्नी व मुलगी गंभीर जखमी झाली होती. पोलिसांनी दिलेल्या माहितीनुसार, शहीद फयाज अहमद यांच्या पत्नीचेही रुग्णालयात निधन झाले. तर मुलीवर रुग्णालयात उपचार सुरू आहेत.दहशतवाद्यांनी रात्री अकराच्या सुमारास फैयाज अहमद यांच्या घरात घुसून कुटुंबावर गोळीबार केला. त्याला स्थानिक रुग्णालयात नेण्यात आले. मात्र, एसपीओ फैयाज अहमद आणि त्यांची पत्नी राजा बेगम यांनी दम तोडला. मुलगी रफियावर रुग्णालयात उपचार सुरू आहेत. पोलिसांनी दिलेल्या माहितीनुसार, या भागाला घेराव घालण्यात आला असून शोध मोहीम सुरू आहे.

शनिवारी काश्मीरमध्ये ग्रेनेडमध्ये हल्ला झाला होता. दहशतवाद्यांनी ग्रेनेड फेकल्यानंतर परिसरात नाकाबंदी करण्यात आली होती. ग्रेनेड फेकलेल्या दहशतवाद्यांचा सुरक्षा दलाकडून शोध सुरू आहे. ग्रेनेडचा स्फोट झाल्यानंतर मोठे नुकसान झाले नाही. यापूर्वी दहशतवाद्यांनी ७ मे रोजी श्रीनगरमधील नवा बाजार परिसरातील सुरक्षा दलावर ग्रेनेड फेकले होते. शोपियान जिल्ह्यात तीन दहशतवाद्यांना सुरक्षा दलाने कंठस्नान घातल्यानंतर ग्रेनेड फेकल्याची घटना समोर आली होती.

पुणे- अखेर रयत शेतकरी संघटना राणी ताई चव्हाण पश्चिम महाराष्ट्र अध्यक्ष व पल्लवी ताई गायकवाड आकाश महाडिक सरचिटणीस यांच्या प्रयत्नांना यश मिळाले. सरकार ने सुद्धा याची दखल घेतली. आता गेल्याच आठवड्यात चव्हाण यांनी भागातील काही लोकांच्या भेटी घेऊन चर्चा केली होती. तेव्हा त्यांनी  मंत्रालयात साठ वर्षांच्या वरती वय असणाऱ्यांना महिना पेन्शन चालू कारवाई असे निवेदन दिले हते. अखेर सरकारला त्यांच्या मागण्या पूर्ण कारवाया लागल्या. लवकरच आपल्या वयोवृध्द लोकांना पेन्शन चालु होत आहे. शेती आहे पण पीक नाही पीक आहे तर पाऊस नाही पाणी नाही त्यात कोरोनाचे दिवस  यामुळे शेतकरी हतबल झाला होता. त्यांच्या मागण्या नुसार लवकरच साठ वर्षांच्यावरील लोकांना महिना ६००० पेन्शन चालू होत आहे. त्यामुळे अनेक भागातून रयत शेतकरी संघटनाचे कौतुक होत आहे.अखेर सरकारला मागण्या पूर्ण कारवाया लागल्या. यावेळी सर्व पश्चिम महारा्ट्रातील कार्यकर्त्याकडून   चव्हाणांनी केलेल्या कामाचे कौतुक होत आहे.

अहमदनगर - नगर महानगरपालिकेच्या महापौर व उपमहापौर पदांसाठी निवडणुकीचा कार्यक्रम जाहीर झाला आहे. यात महापौर आणि उपमहापौर या दोन्ही पदांसाठी नामनिर्देशनपत्र मंगळवारी दुपारी दीड वाजेपर्यंत दाखल करण्यास वेळ दिला आहे. बुधवारी ऑनलाइन पद्धतीने मतदान प्रक्रिया होणार असल्याची माहिती नगर सचिव यांच्या कार्यालयाकडून देण्यात आली आहे. नगर महानगरपालिकेच्या महापौर व उपमहापौर पदाच्या निवडणुकीसाठी अवघे ३ दिवस राहिले आहेत. या दोन्ही पदाच्या निवडीसाठी राष्ट्रवादी काँग्रेस आणि शिवसेनेत समझोता झाला आहे. महापौर पद शिवसेनेकडे तर राष्ट्रवादीकडे उपमहापौर पद राहण्याची शक्यता आहे. काँग्रेसला मात्र बाजूला ठेवण्यात आले आहे. त्यामुळे काँग्रेसची भूमिका काय राहणार याकडे लक्ष आहे. तर ऐनवेळी भाजप काय खेळी करणार याकडेही सर्वांच्या नजरा लागल्या आहेत. तर या सगळ्या राजकारणामध्ये कोणाच्या गळ्यात महापौर-उपमहापौर पदाची माळ पडणार हे पाहणे उत्साहाचे ठरणार आहे. दरम्यान निवडणुकीचे पीठासीन अधिकारी म्हणून जिल्हाधिकारी डॉ. राजेंद्र भोसले यांची नियुक्ती विभागीय आयुक्तांनी केली आहे. शुक्रवारी निवडणुकीचा कार्यक्रम जाहीर झाला. नामनिर्देशनपत्र घेणे आणि दाखल करण्यासाठी सोमवारी व मंगळवारी (२८ व २९ जून) हे दोन दिवस असणार आहेत. नामनिर्देशन पत्र मंगळवारी दुपारी दीड वाजेपर्यंत दाखल करता येतील. नंतर दुसर्‍या दिवशी बुधवारी सकाळी ११ वाजता महापौर पदाच्या निवडणुकीची प्रक्रिया सुरू होईल. या अगोदर दाखल नामनिर्देशनपत्रांची छाननी होईल. त्यानंतर नामनिर्देशन पत्र माघारी घेण्यासाठी १५ मिनिटांचा वेळ दिला जाईल. त्यानंतर मतदान प्रक्रिया सुरू होईल. याच पद्धतीने उपमहापौर पदाची प्रक्रिया असणार आहे. दरम्यान नामनिर्देशन पत्र हे महापालिकेतील नगर सचिव कार्यालयांमध्ये उपलब्ध होतील, असे नगर सचिव यांच्या कार्यालयाकडून कळविण्यात आले आहे.

लोणावळा - इतर मागास प्रवर्गाचे (ओबीसी) राजकीय आरक्षण कायम राहण्यासाठी विरोधी पक्षनेते देवेंद्र फडणवीस यांनी ओबीसी समाजाचे नेतृत्व करावे, असे आवाहन अन्न आणि नागरी पुरवठामंत्री छगन भुजबळ यांनी केले. सर्व श्रेय त्यांनी घ्यावे, पण आमचे आरक्षण वाचवावे, असेही ते म्हणाले.एकीकडे ओबीसी राजकीय आरक्षणाच्या मुद्द्यावर भाजपचे राज्यव्यापी चक्काजाम आंदोलन सुरू असताना भुजबळ यांनी फडणवीस यांना ओबीसी समाजाचे नेतृत्व करण्याचे आवाहन लोणावळा येथील ‘ओबीसी-व्हीजेएनटी न्याय हक्क समिती’च्या चिंतन बैठकीत केले. भुजबळ म्हणाले, ‘‘पक्ष कोणताही असला तरी त्याने  काही फरक पडत नाही, ओबीसी समाजाला न्याय मिळवून देण्यासाठी भांडणाऱ्या सर्वांचे आम्ही स्वागत करतो. फडणवीस यांनी ओबीसी समाजाचे नेतृत्व करावे. सर्व श्रेय त्यांनी घ्यावे, पण आमचे आरक्षण वाचवावे.’’ २०१६ मध्ये देशातील सर्व ओबीसींची माहिती संकलित करून केंद्राकडे देण्यात आली होती. ही माहिती न्यायालयात का सादर केली गेली नाही? केंद्रात भाजपचे सरकार असल्याने मी फडणवीस यांना ओबीसी समाजाचे नेतृत्व करण्याचे आवाहन केले आहे, असेही भुजबळ यांनी नमूद केले. वडेट्टीवार म्हणाले, सत्ताधारी आणि विरोधक एकमेकांवर आरोप करत राहिले तर ओबीसी आरक्षणाचा मूळ मुद्दा बाजूला राहील. पक्षाचे विचार बाजूला ठेवून सर्वांनी एकत्रितपणे आरक्षण पुन्हा मिळविण्यासाठी लढायला हवे. ज्या समाजाने आपल्याला मोठे केले त्या समाजासाठी एक झाले पाहिजे.या बैठकीला मदत आणि पुनर्वसनमंत्री विजय वडेट्टीवार, माजी मंत्री अण्णा डांगे, माणिकराव ठाकरे, बबनराव ढाकणे, नारायण मुंडे, बाळासाहेब सानप, ईश्वर बाळबुधे, अरुण खरमाटे, साधना राठोड उपस्थित होते.



चेन्नई - खेळाडूंनी आंतरराष्ट्रीय स्तरावर देशाचे नावलौकिक वाढवावे म्हणून खेळाडूंना प्रोत्साहन देण्यासाठी तामिळनाडुचे मुख्यमंत्री एम के स्टॅलिन यांनी मोठी घोषणा केली. त्यांनी तोक्यो ऑलम्पिकमध्ये सुवर्ण पदक जिंकणाऱ्या तामिळनाडूच्या खेळाडूला ३ कोटी रुपयांचा पुरस्कार देण्याचे जाहीर केले आहे. याशिवाय रौप्य पदक जिंकणाऱ्या खेळाडूला २ कोटी रुपये आणि कास्य पदक जिंकणाऱ्या खेळाडूला १ कोटी रुपये रोख रकमेचा पुरस्कार देण्याची घोषणा करण्यात आली. मुख्यमंत्री एम. के. स्टॅलिन म्हणाले, “आंतरराष्ट्रीय पातळीवर आपली वेगळी ओळख निर्माण करणाऱ्या खेळाडूंना प्रोत्साहित करण्यासाठी सरकार कटिब्ध आहे. त्याचाच भाग म्हणून हा रोख रकमेचा पुरस्कार सरकारकडून देण्यात येईल. राज्य सरकार कायमच खेळाडूंना पाठिंबा आणि प्रोत्साहन देईल. खेळाडूंना शारीरिक मजबूती आणि प्रोत्साहनाची आवश्यकता असते. आम्ही डीएमकेच्या (द्रविड़ मुनेत्र कषगम) घोषणापत्रात तामिलनाडूत ४ विभागात ऑलिम्पिक अकॅडमी स्थापन करण्याचे आश्वासन दिले होते. आम्ही ते पूर्ण करणार आहोत.”कोरोना विषाणूच्या संसर्गामुळे तोक्यो ऑलम्पिकचे आयोजन एक वर्षे उशिरा करण्यात आले आहे. आता यंदा ही स्पर्धा २३ जुलै रोजी सुरू होईल. दरम्यान, तामिळनाडूत खेळाडूंसाठी विशेष कोरोना विरोधी लसीकरण शिबिराचे आयोजन करण्यात आले. मुख्यमंत्री स्टॅलिन यांनी नेहरू स्टेडियमवर याचे उद्घाटन केले. तामिलनाडू खेळ विकास प्राधिकरणाच्या युवा कल्याण आणि खेळ विभाग, आरोग्य विभाग आणि तामिळनाडू ऑलम्पिक संघाने संयुक्तपणे या लसीकरण शिबिराचे आयोजन केले होते. या कार्यक्रमाच्या वेळी स्टॅलिन यांनी लसीकरणात सहभागी झालेल्या ६ खेळाडूंना प्रत्येकी ५ लाख रूपयांची रोख प्रोत्साहन रक्कम दिली. यात नौकायनात ऑलम्पिकसाठी पात्र ठरलेल्या नेथरा कुमानन, वरुण ठक्कर आणि के सी गणपती यांच्याशिवाय टेबल टेनिस खेळाडू जी साथियन आणि शरथ कमल आणि पॅरालंपियन टी मरिअप्पन यांचा समावेश आहे.

श्रीनगर - दशहतवाद्यांनी फेकलेल्या ग्रेनेडमध्ये तीन नागरिक जखमी झाले आहेत. ही घटना बारबारशाहमध्ये घडली आहे. शुक्रवारी सायंकाळी साडेआठ वाजता फेकल्याचे अनंतनाग पोलिसांनी म्हटले आहे.दहशतवाद्यांनी ग्रेनेड फेकल्यानंतर परिसरात नाकाबंदी करण्यात आली आहे. ग्रेनेड फेकलेल्या दहशतवाद्यांचा सुरक्षा दलाकडून शोध सुरू आहे. ग्रेनेडचा स्फोट झाल्यानंतर मोठे नुकसान झाले नाही.दहशतवाद्यांनी ७ मे रोजी श्रीनगरमधील नवा बाजार परिसरातील सुरक्षा दलावर ग्रेनेड फेकले होते. शोपियान जिल्ह्यात तीन दहशतवाद्यांना सुरक्षा दलाने कंठस्नान घातल्यानंतर हे ग्रेनेड फेकल्याची घटना समोर आली आहे. सैन्यदलाने चकमकीत दक्षिण काश्मीरमधील शोपियान जिल्ह्यात असलेल्या हांजीपोरा गावात एका दहशतवाद्याला ठार केले. हा दहशतवादी अवंतपुरामधील संभूरा येथील रहिवाशी आहे. मुर्तुजा अहमद दर असे या ठार झालेल्या दहशतवाद्याचे नाव आहे. तर दुसरा दहशतवादी सैन्यदलाला शरण आला आहे.

लखनऊ - आगामी काळात उत्तर प्रदेशमध्ये होणाऱ्या विधानसभा निवडणुकींबाबत, बहुजन समाज पार्टीच्या प्रमुख मायावती यांनी एक मोठी घोषणा केली आहे. उत्तर प्रदेश व उत्तराखंडमधील विधानसभा निवडणुका बसपा स्वबळावरच लढणार असल्याचे त्यांनी जाहीर केले आहे. तसेच, मागील काही दिवसांपासून या विधानसभा निवडणुकीच्या पार्श्वभूमीवर बसपा व एमआयएम यांच्या आघाडी होणार असल्याच्या जोरदार चर्चा सुरू होत्या, त्यावर देखील मायावतींनी भूमिका स्पष्ट केली आहे. बसपा व एमआयएम यांच्यातील आघाडीबाबतच्या चर्चा संपूर्णपणे चुकीच्या आहेत, यामध्ये काहीच तथ्य नाही. असे मायावतींनी सांगितले आहे.बसपा प्रमुख मायावतींनी यासंदर्भात ट्विटद्वारे माहिती दिली आहे, ”माध्यामातील एक वृत्तवाहिनीकडून  अशी बातमी दाखवली जात आहे की, उत्तर प्रदेशमधील आगामी विधानसभेची निवडणूक ओवेसींचा पक्ष एमआयएम व बसपा एकत्र मिळून लढणार आहेत. हे वृत्त पूर्णपणे चुकीचे, अफवा पसरवणारे, तथ्यहीन आहे. यामध्ये काडीमात्रही सत्य नाही. बसपा या वृत्ताचे खंडण करते.”तसेच, ”या संदर्भात पार्टीकडून पुन्हा असे स्पष्ट केले जाते की, पंजाब सोडून उत्तरप्रदेश व उत्तराखंड मधील पुढील वर्षी सुरू होणाऱ्या विधानसभेची निवडणूक बीएसपी कोणत्याही पक्षाशी आघाडी करून लढणार नाही. म्हणजे, स्वबळावरच निवडणूक लढवणार.”यासंदर्भात संभ्रम निर्माण करणाऱ्या बातम्यांच्या पार्श्वभूमीवर बसपाने, आता राष्ट्रीय सरचिटणीस व राज्यसभा खासदार सतीशचंद्र मिश्र यांना बीएसपी सेलचे राष्ट्रीय समन्वयक बनवले आहे.पंजाबमध्ये २०२२ मध्ये विधानसभा निवडणूक होत असून, अकाली दल आणि बहुजन समाज पार्टीने एकत्र निवडणूक लढण्याचा निर्णय घेतला आहे.पंजाबमध्ये आज शिरोमणी अकाली दल आणि बहुजन समाज पार्टीची आघाडी, ही एक नवी राजकीय व सामाजिक सुरूवात आहे. जे की नक्कीच इथे राज्यात जनतेचा बहुप्रतीक्षित विकास, प्रगती व आनंदाच्या नव्या युगाची सुरूवात करेल. या ऐतिहासिक पावलासाठी लोकांचे हार्दिक अभिनिंदन व शुभेच्छा, असे मायावती म्हणाल्या आहेत.


मुंबई - शहरातील नऊ बोगस लसीकरण शिबिरे आयोजित करून नागरिकांची आर्थिक फसवणूक  केल्याबद्दल पोलिसांनी शिवम रुग्णालयाचे प्रमुख डॉ. शिवराज पटारिया, त्यांच्या पत्नी डॉ. नीता पटारिया यांच्यासह १० जणांना अटक केली. या टोळीने संगनमत करून शिवम रुग्णलयात लसीकरणासाठी वापरून झालेल्या कुप्यांमध्ये सलाईन वॉटर भरून कोव्हॅक्सिन, कोव्हिशिल्ड लस म्हणून नागरिकांना दिल्या असल्याचा निष्कर्ष पोलिसांनी काढला आहे. आरोपींवर सदोष मनुष्यवधाचा गुन्हा दाखल करण्यात आला आहे.अशी माहिती सहआयुक्त (कायदा व सुव्यवस्था) विश्वाास नांगरे पाटील यांनी दिली. 

खासगी लसीकरण शिबिरासाठी शिवम रुग्णालयाला परवानगी देण्यात आली होती. गृहसंकुले, कंपन्या, खासगी संस्थांमध्ये लसीकरण शिबिर राबवता यावे यासाठी या रुग्णालयास कोव्हिशिल्ड आणि कोव्हॅक्सिन या दोन्ही लशींच्या १७ हजारांहून अधिक कुप्यांचा साठा पुरविण्यात आला होता. त्यातून १६८०० व्यक्तींना लस दिल्याच्या नोंदी, प्रमाणपत्रे उपलब्ध आहेत. मात्र उपलब्ध साठ्याव्यतिरिक्त रुग्णालयाने जादा लसीकरण केल्याचे तपासात निष्पन्न झाले. अतिरिक्त साठा कोठून प्राप्त केला, लस कुठे, कोणाला, कोणाकरवी दिली या प्रशद्ब्रांची उत्तरे डॉ. पटारिया देऊ शकले नाहीत. तसेच शहरात नऊ ठिकाणी बोगस लसीकरण शिबिरे आयोजित करून नागरिकांची आर्थिक फसवणूक करण्यातही रुग्णालयाचा सहभाग असावा, असा संशय तपासातून निर्माण झाला. त्यामुळे डॉ. पटारिया, डॉ. नीता यांना अटक करण्यात आल्याचे नांगरे पाटील यांनी सांगितले. बोगस लसीकरण शिबिरे आयोजित करणाऱ्या टोळीचे प्रमुख आरोपी महेंद्र प्रताप सिंग आणि डॉ. मनीष त्रिपाठी यांची बँक खाती गोठविण्यात आल्याचेही नांगरे पाटील यांनी सांगितले. दंतचिकित्सक असलेल्या डॉ. त्रिपाठी यांचे नर्सिंग सेंटर शिवम रुग्णालयाच्या आवारात आहे. नऊ बोगस शिबिरांसाठी आवश्यक असलेला लस साठा डॉ. त्रिपाठी यांनी पुरवला होता.  नियमांनुसार लसीकरणासाठी वापर झाल्यानंतर कुपी मोडून टाकणे अपेक्षित होते. मात्र रुग्णालयातर्फे वापरण्यात आलेल्या कुप्या मात्र सुस्थितीत होत्या.

नांगरे-पाटील यांनी दिलेल्या माहितीनुसार आरोपींनी लसींमध्ये भेसळ केल्याचा थेट पुरावा अद्याप हाती आलेला नाही. मात्र या प्रकरणात आतापर्यंत दोनशे जणांचे जबाब नोंदवण्यात आले असून त्यापैकी बहुतांश जणांनी शिबिरांमध्ये आरोपींनी आणलेल्या कुप्या हवाबंद नव्हत्या, अशी माहिती दिली आहे.

महेंद्र प्रताप सिंग, संजय गुप्ता, चंदन सिंग, नितीन मोडे, महोम्मद करिम अकबर अली, गुडीया यादव, डॉ. शिवराज पटारिया, डॉ. नीता पटारिया, श्रीकांत माने, सीमा आहुजा या दहा आरोपींना पोलिसांनी अटक केली आहे.  प्रमुख आरोपी राजेश पांडे आणि डॉ. मनीष त्रिपाठी यांनी अटकपूर्व जामीनासाठी न्यायालयात धाव घेतली आहे. डॉ. त्रिपाठी याच्या नर्सिंग सेंटरमधील दोन विद्यार्थ्यांनाही पोलिसांनी आरोपी केले आहे.या टोळीविरोधात विविध ठिकाणी नोंद झालेल्या गुन्ह््यांच्या तपासासाठी पोलीस आयुक्त हेमंत नगराळे यांनी विशेष तपास पथक स्थापन केले. पोलीस उपायुक्त विशाल ठाकूर हे या पथकाचे प्रमुख असतील. गुन्हे नोंद असलेल्या पोलीस ठाण्यांचे वरिष्ठ निरीक्षक, तपास अधिकारी या पथकात सहभागी असतील.


मुंबई - माजी गृहमंत्री अनिल देशमुख यांचे स्वीय सहाय्यक कुंदन शिंदे आणि संजीव पालांडे यांना अटक करण्यात आली आहे. अंमलबजावणी संचालनालय अर्थात ईडीने (ED) शुक्रवारी रात्री उशिरा दोघांना बेड्या ठोकल्या. मनी लाँड्रिंग प्रतिबंध कायद्या (PMLA) अंतर्गत शिंदे आणि पालांडे यांना अटक करण्यात आली आहे. अनिल देशमुख यांच्या नागपूर निवासस्थानी ईडीने (शुक्रवार) सकाळपासूनच छापेमारी सुरु केली होती. तब्बल ८ ते ९ तास ही छापेमारी चालली होती. नागपुरातील निवासस्थानी देशमुख कुटुंबियांचीही चौकशी करण्यात आल्याची माहिती मिळत आहे. त्यानंतर संध्याकाळी ईडीचे अधिकारी काही कागदपत्रांसह घराबाहेर पडले. तर देशमुख यांच्या दोन्ही खासगी स्वीय सहाय्यकांचीही ईडीकडून चौकशी करण्यात आली. त्यानंतर रात्री उशिरा ईडीने दोघांनाही अटक केली.दुसरीकडे तळोजा कारागृहातून निलंबित पोलीस अधिकारी सचिन वाझे याचाही जबाब नोंदवण्यात आला. तसेच ईडीच्या अधिकाऱ्यांनी मुंबईतील काही बार मालकांचेही जबाब नोंदवल्याचे कळते. सुमारे १० ते १२ बार मालकांचा जबाब ईडीने नोंदवला आहे. या बार मालकांनी मिळून काही महिने ४ कोटी रुपये हप्ता दिल्याची कबुली दिली आहे. त्याच अनुषंगाने आता ईडीची कारवाई सुरु असल्याची माहिती आहे.

मुंबईचे माजी पोलीस आयुक्त परमबीर सिंग यांनी मुख्यमंत्र्यांना पत्र लिहून गंभीर आरोप केले होते. त्या पत्रानुसार निलंबित सहायक पोलीस निरीक्षक सचिन वाझे हे क्राईम इंटिलिजन्सचे यूनिट हेड करत होते. गेल्या काही महिन्यात गृहमंत्री अनिल देशमुखांना कित्येक वेळेस वाझेंना त्यांच्या ज्ञानेश्वर या निवासस्थानी बोलवले आणि दर महिन्याला १०० कोटी रुपये जमा करायला सांगितले. देशमुख वाझेंना म्हणाले की, मुंबईत १७५० बार आणि रेस्टॉरंट आहेत आणि त्यातल्या प्रत्येकाकडून २ ते ३ लाख रुपये कलेक्ट केले तरीसुद्धा महिन्याला ४० ते ५० कोटी रुपये सहज उपलब्ध होतील. राहिलेली इतर रक्कम इतर मार्गांनी जमा करता येईल. देशमुख हे पोलीस अधिकाऱ्यांना त्यांच्या निवसस्थानी बोलवायचे. पोलिसांना ते सातत्याने सूचना द्यायचे. मला किंवा वरिष्ठ अधिकाऱ्यांना अंधारात ठेऊन देशमुख हे पोलीस अधिकाऱ्यांना त्यांच्या बंगल्यावर बोलवायचे आणि पैसे गोळा करण्यासाठी टार्गेट द्यायचे. टार्गेटनुससार ते पोलीस अधिकाऱ्यांना कार्यालयीन कामकाजात तसेच आर्थिक व्यवहारात सल्ला आणि निर्देश द्यायचे. पैसे गोळा करण्यासाठी पोलीस अधिकाऱ्यांचा ते उपयोग करायचे. त्यांचे हे भ्रष्ट आचरण अनेक पोलीस अधिकाऱ्यांच्या नजरेस आले होते, आदी आरोप मुंबईचे माजी पोलीस आयुक्त परमबीर सिंग यांनी देशमुखांवर केले होते. त्यांनी मुख्यमंत्री उद्धव ठाकरे आणि राज्यपाल भगतसिंह कोश्यारी यांना पत्रं लिहून हे आरोप केले होते.




मुंबई - मुंबई महापालिकेची निवडणूक फेब्रुवारी २०२२ मध्ये होणार आहे. तत्पूर्वी वॉर्ड डिलिमेटेशन म्हणजे प्रभाग रचना होणार असल्याचे राज्य निवडणूक आयोगाने स्पष्ट केले आहे. डिलिमिटेशन करण्यासाठी शिवसेना आणि काँग्रेस आग्रही आहे. तर भाजपचा मात्र याला विरोध आहे. प्रभागांचे सीमांकन बदलल्यास कोर्टात जाण्याचा इशारा भाजपने दोन दिवसांपूर्वीच दिलेला आहे.राज्य निवडणूक आयोगाने मुंबई महापालिकेचे विरोधी पक्षनेते रवि राजा यांना पत्र पाठवले आहे. प्रारुप प्रभाग रचना जाहीर करणार असून त्यानंतर हरकती आणि सूचना मागवणार असल्याचे पत्रात स्पष्ट केले आहे. रवि राजा यांनी २०१७ मध्ये निवडणूक आयोगाला पत्र लिहून भाजपने भौगोलिक सलगता न ठेवता आपल्या सोयीच्या दृष्टीने सुमारे ४५ प्रभागांची रचना केल्याची तक्रार केली होती. त्यामुळे संबंधित प्रभागांची रचना बदलण्याची मागणी त्यांनी केली होती.पालिका अधिनियमानुसार दर पाच वर्षांनी निवडणुकीपूर्वी प्रभाग रचना करण्याचा नियम आहे. त्यामुळे नियमानुसार ही प्रभाग रचना होणार असल्याचे राज्य निवडणूक आयोगाकडून सांगण्यात आले आहे.

कोरोनामुळे अनेक महानगरपालिकांच्या निवडणुका पुढे ढकलल्या आहेत. मात्र मुंबई महापालिकेची निवडणूक ठरल्या वेळेतच होण्याची चिन्हं आहेत. मुंबई महापालिकेचा कार्यकाळ फेब्रुवारी २०२२ मध्ये संपत आहे. त्यामुळे त्यावेळीच निवडणूक होणे अपेक्षित आहेत. मात्र सध्याची कोरोनाची स्थिती आणि संभाव्य तिसरी लाट पाहता, त्याबाबत त्या त्या वेळी निर्णय घेतला जाईल, असे राज्य निवडणूक आयोगाने मुंबई महापालिकेला कळवल्याचे महापौर किशोरी पेडणेकर यांनी जून महिन्याच्या सुरुवातीला सांगितले होते.

मुंबई महापालिकेने राज्य निवडणूक आयोगाला यासंदर्भात पत्र लिहिले होते. मुंबई महापालिका ही आशिया खंडातील सर्वात मोठी महापालिका आहे. साहजिकच या महापालिकेच्या सत्तेच्या चाव्या खिशात ठेवण्यासाठी राजकीय पक्षांची धडपड सुरु असते. बीएमसी निवडणूक फेब्रुवारी २०२२ मध्ये होणार आहे. म्हणजेच अद्याप जवळपास ९ महिन्यांचा कालावधी निवडणुकीला शिल्लक आहे. आधीपासूनच निवडणुकीच्या पार्श्वभूमीवर राजकीय वातावरण तापायला सुरुवात झाली आहे.


ठाणे -  स्थानिक स्वराज्य निवडणुकीत ओबीसी आरक्षण रद्द करण्यात आल्यामुळे भाजपाने आज राज्यभरात चक्काजाम आंदोलन करत आहे.  ठाण्यात देखील भाजपातर्फे चक्का जाम आंदोलन करण्यात आले होते. पण आंदोलन सुरू होण्याआधीच भाजपचे विधान परिषदेचे विरोधीपक्ष नेते प्रवीण दरेकर यांना पोलिसांनी ताब्यात घेतली. मुंबई आणि ठाण्याच्या वेशीवर ज्ञानसाधना कॉलेजजवळ भाजपच्या वतीने चक्का जाम आंदोलन करण्यात आले होते. काही सेकंदच पोलिसांनी हे चक्का जाम आंदोलन होवू दिले. या नंतर पोलिसांनी आंदोलकांना ताब्यात घेतले. विधान परिषदेचे विरोधी पक्षनेते प्रवीण दरेकर, आमदार निरंजन डावखरे आणि संजय केळकर यांच्यासह सर्व नगरसेवक आणि पदाधिकाऱ्यांना देखील पोलिसांनी ताब्यात घेतले.आज सकाळी ठीक १० वाजता या आंदोलनाला सुरुवात झाली त्या आधी ९ वाजल्यापासून भाजपा कार्यकर्ते आंदोलन स्थळी जमायला सुरुवात झाली होती. १० च्या सुमारास प्रवीण दरेकर आले आणि त्यांनी चक्का जाम आंदोलनलाला सुरुवात केली आणि लगेच पोलिसांनी अवघ्या काही सेकंदात आंदोलकांना ताब्यात घेतले.




मुंबई - ‘ये रिश्ता क्या कहलाता है’ फेम प्रसिद्ध टीव्ही अभिनेता करण मेहरा पुन्हा एकदा अडचणीत सापडला आहे. करण मेहरा याची पत्नी निशा रावल हिने करणवर दुसरा गुन्हा दाखल केला आहे. ३१ मेला सुद्धा करणवर निशाने घरगुती वादाप्रकरणी आरोप लावत गुन्हा दाखल केला होता. करण मेहराची पत्नी आणि अभिनेत्री निशा मेहरा हिने करणवर इच्छे विरुद्ध अत्याचार केल्याचे आरोप लावत गोरेगाव पोलीस स्टेशनमध्ये गुन्हा नोंदवला आहे. तसेच करणच्या घरातील सदस्य अजय मेहरा, बेला मेहरा आणि कुणाल मेहरा या तिघांवर ही तिने मारहाण आणि जाणीवपूर्वक त्रास दिल्याचे आरोप लावले आहेत. इतकेच नाही तर बँक अकाउंटमधून करणने तब्बल एक कोटींपेक्षा अधिकची रक्कम काढल्याचे आरोप ही निशाने करणवर लावला आहे. त्यामुळे करणच्या अडचणी वाढल्या आहेत. पती करण मेहरा याच्याविरोधात एफआयआर नोंदविल्यानंतर अलीकडेच निशा रावल हिने माध्यमांशी बोलताना संपूर्ण परिस्थिती सांगितली. स्वतःवर झालेल्या हल्ल्यानंतर तिने त्याचे काही फोटो देखील माध्यमांना दाखवले. हे फोटो समोर आल्यानंतर, आपला बचाव करत करणने निशाला ‘वेडी’ म्हटले होते. त्याला उत्तर देताना निशा म्हणाली होती की, ‘मी मानसिक आजाराने ग्रस्त होते, पण आता माझ्यावरील उपचार पूर्ण झाले आहेत आणि मी पूर्णपणे ठीक आहे’.मीडियाशी बोलताना निशाने सांगितले होते की, करणचे दिल्ली स्थित एका मुलीशी अफेयर सुरु आहे. त्याला आता तिच्याबरोबर राहायचे आहे. गेल्या अनेक महिन्यांपासून तो चंदीगडमध्ये शूटिंग करत होता. जिथे माझ्या विचारण्यावर आता त्याने काबुल केले आहे की, त्याचा त्या मुलीशी भावनिक आणि शारीरिक संबंध आहे. ज्यामुळे त्याला घटस्फोट हवा आहे. पण ३१ मेच्या रात्री आमच्यात काही वाद झाले आणि त्यावेळी त्याने माझे डोके भिंतीवर आपटले आणि त्यानंतर माझ्या कपाळातून मोठ्या प्रमाणात रक्तस्त्राव होऊ लागला. त्यानंतरच मी त्याच्यावर एफआयआर दाखल करण्याचा निर्णय घेतला.तब्बल सात वर्ष करण ‘ये रिश्ता क्या कहलाता है’ मध्ये मुख्य भूमिकेत दिसला होता. यात त्याने नैतिक सिंघानियाची भूमिका साकारली होती. शोमध्ये तो अभिनेत्री हिना खानसोबत दिसला होता. करण मेहरा या शोमधून प्रचंड हिट ठरला होता. सध्या या शोमध्ये मोहसीन खान आणि शिवांगी जोशी मुख्य भूमिका साकारत आहेत. करण मेहराने बिग बॉस १० मध्येही भाग घेतला होता. गेले काही दिवस करण आपल्या आगामी पंजाबी प्रोजेक्टमध्ये व्यस्त होता आणि निशा आपल्या मुलासमवेत मुंबईत होती. २०१२ साली निशा आणि करणचे लग्न झाले. यानंतर, २०१७ मध्ये हे दांपत्य एका मुलाचे पालक बनले.

मुंबई  - बॉलिवूडमध्ये अभिनेता रणवीर सिंगने आपली एक वेगळी छाप सोडली आहे. आपल्या करिअरला त्याने एक वेगळाच वेग दिला आणि सगळे रेकॉर्ड्स ब्रेक केले. अनेक सुपरहिट चित्रपट रणवीरने दिले. पण रणवीरविषयी बॉलिवूडचा प्रसिद्ध दिग्दर्शक , निर्माता करण जोहरने एक वेगळच भाकीत केले होते.

करण जोहरने आजवर अनेक नवोदित अभिनेते अभिनेत्रींना लाँच केले आहे. तर अनेकांच्या करिअरची सुरूवातच करणने केली आहे. करणने रणवीरच्या करिअरच्या सुरूवातीच्या काळावर एका मुलाखतीत भाष्य केले होते. करणच्या म्हणण्यानुसार त्याला सुरूवातीला रणवीर सिंगमध्ये हिरो सारखी कोणतीच गोष्ट दिसत नव्हती. २०१९ मध्ये एका मुलाखतीत करणणे हे सांगितले होते कि, “मला रणवीरमध्ये कोणतीच स्टार वाली गोष्ट दिसत नव्हती. मला वाटत होते त्याने चित्रपटांत येऊ नये.” पण रणवीरचा परफॉर्मन्स पाहिल्यानंतर करणने आपले मत बदलले तो म्हणाला, “रणवीरचे काम पाहिल्यावर मला वाटले हा मुलगा तर सुपस्टार आहे.”त्यानंतर करणने आणखी काही गोष्टींचा खुलासा केला होता. तो म्हणाला होता, “हा काळ सुपरस्टार्सचा नाही तर अभिनय करणाऱ्यांचा आहे. जर तुम्ही अभिनय करू शकत नसाल तर सुंदर बॉडी असणे निरर्थक आहे.” रणवीर सिंग लवकरच करणच्या दोन चित्रपटांत दिसणार आहे.

नवी मुंबई - शहरात करोना रुग्णांची संख्या वाढत असून महापालिका प्रशासनाने वेगवान लसीकरणाची तयारी करीत १०४ केंदे सज्ज ठेवली आहेत, मात्र लस तुटवडा कायम असल्याने लसीकरणाचा पेच वाढला आहे. २५ जून रोजी ९०० लस कुप्या उपलब्ध झाल्याने लस कोणाला द्यायची, हा प्रश्न प्रशासनासमोर निर्माण झाला होता.लसीकरण केंद्रांवर रांगेत उभे राहूनही लस मिळत नसल्याने नागरिकांमध्ये संताप आहे. त्यात १८ वर्षांवरील लसीकरण सुरू करण्यात आल्याने लसीकरणासाठी मोठी गर्दी होत आहे. त्यामुळे लसीकरण केंद्रे बंद ठेवावी लागत आहेत.शहरात करोनाची दुसरी लाट ओसरत असताना शहरात पुन्हा एकदा दैनंदिन रुग्णांची संख्या वाढत आहे. करोनापासून सुरक्षित राहण्यासाठी सध्या तरी लसीकरण महत्त्वाचे आहे. त्यामुळे पालिका प्रशासनाने नागरिकांना राहत्या घराजवळ लसीकरण करण्यासाठी पालिकेने नियोजन केले आहे. एकूण १०४ लसीकरण केंद्रांचे नियोजन असून प्रत्यक्षात ७४ केंद्रावर लसीकरण करण्यात येत आहे. मागील काही दिवसांपासून ठाणे जिल्ह्यसाठी येणाऱ्या लस कुप्या अल्पप्रमाणात मिळत असल्याने पालिकेची अडचण निर्माण झाली आहे. त्यातच १८ वर्षांवरील लसीकरणही सुरू करण्यात आले आहे. लस उपलब्ध होत नसल्याने पालिकेच्या मोजक्याच रुग्णालयाच्या केंद्रावर होत आहे. तिथेही फक्त १०० मात्रा मिळत आहेत. लस उपलब्धतेनुसार टोकन देण्यात येत आहे, परंतु नागरिकांनी टोकन वाटण्यासाठीच विरोध होत आहे. त्यामुळे लसीकरणाची मोहीम विस्कळीत झाली आहे. शुक्रवारी पालिकेला फक्त ९०० लस मिळाल्यामुळे अधिकच गोंधळ झाल्याचे चित्र पाहायला मिळाले. त्यामुळे योग्य लससाठा प्राप्त झाल्याशिवाय लसीकरण बंद ठेवण्याचा निर्णय घेण्यात येणार असल्याचे पालिकेच्या लसीकरण प्रमुख डॉ.रत्नप्रभा यांनी सांगितले.

नवी मुंबई - अनाथ मुलांसाठी नवी मुंबई महापालिका अगोदरपासूनच आर्थिक मदत करीत आहे. आता करोनाकाळात ० ते १८ वर्षे वयोगटातील मुलांचे एक किंवा दोन्ही पालकांचा मृत्यू झाल्या असल्यास पालिकेने नव्याने आर्थिक मदत करण्याचा निर्णय घेतला आहे. यात प्रतिलाभार्थी १ ते ६ हजारांपर्यंत आर्थिक मदत प्रतिमहिना करण्यात येणार आहे.करोनाच्या दोन्ही लाटेत अनेक कुटुंबांचा आधार हरपला आहे. राज्यात तर अनेक कुटुंबात एकही सदस्य शिल्लक राहिला नसल्याचीही अनेक उदाहरणे आहेत. तर अनेक कुटुंबात एक किंवा दोन्ही पालकांचा करोनामुळे मृत्यू झालेल्यांची संख्या मोठी आहे. नवी मुंबई महापालिका क्षेत्रात आतापर्यंत शहरात एक व दोन्ही पालकांचा मृत्यू झालेल्याची संख्या ३३ इतकी आहे.  करोनामुळे अशा अनाथ बालकांची तसेच पतीचे निधन झालेल्या महिलांपुढे पुढील आयुष्य कसे घालवायचे हा मोठा प्रश्न उभा असून त्यांना आर्थिक मदतीची मोठी गरज आहे. यासाठी महापालिका प्रशासनाने चार नवीन योजना तयार आखल्या आहेत. ही मदत मुले अठरा वर्ष पूर्ण करेपर्यंत करण्यात येणार आहे.करोनामुळे अनेक कुटुंबांनी आपले आप्तस्वकीय गमावले आहेत. ही झालेली हानी कोणीच भरून काढू शकत नाही. मात्र दोन्ही किंवा एक पालक गमावलेली मुले तसेच वैधव्य आलेल्या महिलांना आर्थिक मदतीच्या माध्यमातून जगण्याची उभारी देणे आवश्यक आहे. त्यासाठी छोटेसे योगदान म्हणून नवी मुंबई महानगरपालिकेच्या वतीने  करण्यात येणार असून यासाठी ४ नवीन योजना राबविल्या जात असल्याची माहिती पालिका आयुक्त अभिजीत बांगर यांनी दिली.

चारही योजनांची सविस्तर माहिती, सादर करावयाची कागदपत्रे तसेच इतर अनुषांगिक माहिती नवी मुंबई महानगरपालिकेच्या ६६६.ल्लेू.ॠ५.्रल्ल या संकेतस्थळावर ‘कोव्हीड योजना’ या लिंकवर उपलब्ध आहे. तसेच पालिका मुख्यालयातील समाज विकास विभागात कार्यालयीन वेळेत माहिती मिळू शकेल.

दोन्ही पालक गमावलेल्या १८ ते २१ वयोगटातील बेरोजगार युवक / युवतींकरिता शैक्षणिक बाबी वगळून इतर बाबींच्या खर्चासाठी ५० हजार प्रतिवर्ष अर्थसहाय्य दिले जात आहे.करोनामुळे पतीचे निधन झालेल्या महिलेस एकरक्कमी १ लाख ५० हजार अर्थसहाय्य. तसेच वैद्यव्य आलेल्या महिलेस स्वयंरोजगारासाठी दोन टप्प्यात १ लाख रुपये.

मिरा-भाईंदर - बनावट यूएलसी प्रमाणपत्र प्रकरणी आरोपी असलेले मिरा-भाईंदर महापालिकेतील नगररचनाकार दिलीप घेवारे यांना गुन्हे शाखेने सुरतमधून ताब्यात घेतले आहे. घेवारे यांनी अटकपूर्व जामीनासाठी ठाणे न्यायालयात अर्जही केला आहे. बनावट यूएलसी प्रमाणपत्र प्राप्त करून कोट्यवधी रुपायांच्या (१०२ कोटी ८२ लाख) शासकीय महसुलाचे नुकसान केल्याप्रकरणी ठाणे गुन्हे शाखा चौकशी करत आहे. हे प्रकरण २०१६ मधील असून त्यावेळी पाच जणांना अटक करण्यात आली होती.नुकतेच मिरा -भाईंदर महापालिकेतील निवृत्त सहाय्यक नगररचनाकार सत्यवान धनेगावे, पालघर जिल्हाधिकारी कार्यालयातील कनिष्ठ आरेखक भरत कांबळे आणि वास्तुविशारद चंद्रशेखर उर्फ शेखर लिमये या तिघांना अटक करण्यात आली होती. कारवाईमुळे या प्रकरणातील अटक आरोपींची संख्या ९ झाली आहे.

बनावट यूएलसी प्रमाणपत्राचे प्रकरण २०१६ मध्ये समोर आल्यानंतर जिल्ह्यात खळबळ उडाली होती. मौजे भाईंदर येथील १७ सर्व्हेपैकी सर्व्हे क्रमांक ६६३, ६६४, ५६९/१, ६६१/१,२,३ आणि ६६२/२ वरील सर्व जमीन ही सन १९९७ च्या मिरा-भाईंदर विकास आराखड्यानुसार रहिवासी क्षेत्रामध्ये (आर झोन) समाविष्ट असली तरी ठाण्यातील यूएलसी कार्यालयातील तत्कालीन संबंधित अधिकाऱ्यांनी यूएलसी प्रमाणपत्र देताना सदरचा सर्व्हे हा मुंबई महानगर प्रादेशिक मंडळ १९७३ नुसार हरित क्षेत्रात (जी झोन) आहे. तसेच गावठाणापासून २०० मीटर बाहेर असल्याने नागरी जमीन कमाल धारणा कायद्याच्या तरतुदी लागू होण्यापासून मुक्त आहे, अशा प्रकारचे बनावट यूएलसी प्रमाणपत्र संबंधित विकासकास दिले होते. या आर्थिक व्यवहार झाला होता. या बनावट प्रमाणपत्राच्या आधारे संबंधित विकासकाने मिरा-भाईंदर महापालिकेकडून ठाणे जिल्हाधिकारी यांच्याकडील अकृषिक आदेश प्राप्त करण्यासाठी ना हरकत प्रमाणपत्र घेऊन अकृषिक आदेश प्राप्त केलेले आहेत. त्यानंतर बनावट यूएलसी प्रमाणपत्र आणि जिल्हाधिकारी यांच्याकडील अकृषिक आदेश तसेच इतर कागदपत्रांच्या आधारे मिरा-भाईंदर महापालिकेकडून बांधकाम परवाना मंजूर केला. आणि सदरची जागा विकसित करून शासनाची फसवणूक केली. तसेच कोट्यावधी रुपयांच्या महसुलाचे नुकसान केल्याप्रकरणी २०१६ मध्ये ठाणेनगर पोलीस ठाण्यात फसवणुकीसह इतर कलमाखाली गुन्हा दाखल करण्यात आला होता.

ठाणे - पश्चिम मुंबई उपनगरात कांदिवली पोलीस ठाणे आणि खार पोलीस ठाण्यामध्ये बोगस लसीकरण करणाऱ्या टोळीला पोलिसांनी अटक केली होती. याच टोळीने श्रीजी आरकेड येथील रेन्यूबाय डॉट कॉम या कंपनीतील कर्मचाऱ्यांना कोव्हीशिल्ड लस म्हणून चक्क पाण्याचे इंजेक्शन दिल्याचे उघडकीस आले आहे. या प्रकरणी कंपनीने नौपाडा पोलीस ठाण्यात गुन्हा दाखल गेला आहे. हिरानंदानी सोसायटीतील नागरिकांना बनावट कोरोना लस आणि प्रमाणपत्र देऊन पैसे उकळण्याचा प्रकार समोर आला होता. त्याचनंतर ही बोगस लसीकरण करणारी टोळी मुंबईसह ठाण्यातही सक्रिय झाल्याचे चित्र दिसत आहे.नौपाडा पोलीस स्टेशनच्या हद्दीत श्रीजी आरकेड येथे रेन्यूबाय डॉट कॉम नामक एका कंपनीचे कार्यालय आहे. या कंपनीच्या व्यवस्थापनाने स्वखर्चाने आपल्या कर्मचाऱ्यांना कोरोना लस देण्याचे नियोजन केले होते. त्यानुसार कंपनीने हे काम महेंद्र सिंग, श्रीकांत माने, संजय गुप्ता, सीमा आहुजा, करीम यांना सोपवले होते. या टोळीने कोव्हीशिल्ड लस असल्याचे भासवून कंपनीच्या कर्मचाऱ्यांना चक्क पाणी असलेले इंजेक्शन दिले. इतकेच नव्हे तर लस घेणाऱ्या कर्मचाऱ्यांना बोगस प्रमाणपत्र देखील दिले. हिरानंदानी सोसायटी बनावट कोरोना लस प्रकरणानंतर पोलीस तपासादरम्यान अश्याचप्रकारचे बोगस लसीकरण येथेही झाल्याचे उघडकीस आले आहे. हा सारा प्रकार २६ मे २०२१ रोजी घडला. त्यानंतर रेन्यूबाय डॉट कॉम या कंपनीचे क्लस्टर सेल मॅनेजर उर्णव हिरालाल दत्ता यांनी बोगस लस टोचणाऱ्या टोळी विरोधात नौपाडा पोलिसात तक्रार दाखल केली. नौपाडा पोलिसांनी या प्रकरणी २५ जून रोजी आरोपींविरोधात गुन्हा दाखल केला आहे. या लसीकरणात आरोपींनी नागरिकांना एक हजार रुपये आकारात लसीकरण म्हणून चक्क पाण्याचे इंजेक्शन दिले आहे. अशा प्रकारे फसवणूक करत बोगस सर्टिफिकेटही देण्यात आले आहे.



मुंबई -
बनावट कागदपत्र बनवून फसवणूक करण्याच्या संदर्भामध्ये पुण्यातील प्रसिद्ध बांधकाम व्यावसायिक श्रीकांत पुरुषोत्तम परांजपे व प्रशांत पुरुषोत्तम परांजपे या दोघांना मुंबई पोलिसांच्या विलेपार्ले पोलिसांनी ताब्यात घेतले आहे. बनावट कागदपत्रांच्या आधारावर आपली फसवणूक झाल्याची तक्रार वसुंधरा डोंगरे यांनी विलेपार्ले पोलिसांकडे केली होती. यासंदर्भात विलेपार्ले पोलीस ठाण्यांमध्ये कलम ४७६, ४६७, ६८, ४०६, ४२० व १२० (ब) कलमांतर्गत गुन्हा नोंदविण्यात आलेला आहे. यासंदर्भात पोलिसांकडून परांजपे बंधूंची चौकशी केली जात आहे.नातेवाईक महिलेची फसवणूक केल्याप्रकरणी पुण्यातील प्रसिध्द बांधकाम व्यावसायिक परांजपे बंधुना विलेपार्ले पोलिसांनी राहत्या घरातून ताब्यात घेतले. परांजपे बंधू हे पुण्यातील नामांकित बांधकाम व्यावसायिक आहेत.  शशांक पुरुषोत्तम परांजपे (वय, ५९) आणि श्रीकांत पुरुषोत्तम परांजपे (वय, ६३) अशी ताब्यात घेण्यात आलेल्या दोघांची नावे आहेत. विलेपार्ले पोलीस ठाण्यात या दोघांवर गुन्हा दाखल करण्यात आला आहे. याबाबत वसुंधरा डोंगरे यांनी तक्रार दिली आहे. त्यांच्या तक्रारीनुसार पोलिसांनी राहत्या घरातून ताब्यात घेतले आहे. 

सूत्रांच्या माहितीनुसार, फिर्यादी या परांजपे कुटुंबातील आहेत. मुंबईतील विलेपार्ले येथे परांजपे यांच्या काही जागा आहेत. ती जागा विक्री करण्यात आली. फिर्यादी या जागेच्या वारस आहेत. मात्र, फिर्यादीला कळू न देता ही जागा विक्री केली. हा प्रकार समोर आल्यानंतर त्यांनी मुंबई पोलिसांकडे तक्रार दिली होती. याबाबत विलेपार्ले पोलीस ठाण्यात खोटे दस्ताऐवज बनवून, तसेच विश्वासघात आणि फसवणूक केल्याबाबत गुन्हा दाखल करण्यात आला आहे. त्यानुसार त्यांना विलेपार्ले पोलिसांच्या पथकाने रात्री पुण्यातील राहत्या घरातून ताब्यात घेतले आहे. त्यांना घेऊन विलेपार्ले पोलीस मुंबईला रवाना झाले. 

मुंबई  -  करोनाचे संकट कायम आहे. यामुळेच घाईघाईत व्यवहार खुले करू नका व गर्दी होणार नाही याची खबरदारी घ्या, असा आदेश मुख्यमंत्री उद्धव ठाकरे यांनी अधिकाऱ्यांना गुरुवारी दिला. करोनाचा संसर्गदर जास्त असलेल्या सात जिल्ह्यांमध्ये अधिक खबरदारी घेण्यास सांगण्यात आले आहे.करोना परिस्थितीवर मुख्यमंत्री उद्धव ठाकरे यांनी वरिष्ठ अधिकाऱ्यांशी चर्चा केली. तसेच संसर्गदर अधिक असलेल्या रायगड, सिंधुदुर्ग, रत्नागिरी, सातारा, सांगली, कोल्हापूर आणि हिंगोली या सात जिल्हाधिकाऱ्यांशी संवाद साधला. आरोग्यमंत्री राजेश टोपे व कृतिदलाचे तज्ज्ञ या वेळी उपस्थित होते.निर्बंध काहीसे शिथिल के ल्यावर गर्दी वाढली आहे. करोनाचे संकट अजूनही कायम आहे. अशा वेळी नागरिक मुक्तपणे बाहेर फिरू लागल्यास करोनाचा संसर्ग वाढण्याची भीती आहे. करोनाच्या उत्परिवर्तित विषाणूचा धोका वाढला आहे. यामुळेच निर्बंध मुक्त करण्याची घाई करू नका, अशा स्पष्ट सूचना मुख्यमंत्र्यांनी दिल्या.

रायगड, रत्नागिरी, सिंधुदुर्ग, सातारा, सांगली, कोल्हापूर आणि हिंगोली या सात जिल्ह्यांमध्ये करोना रुग्णसंख्या आणि संसर्गदर अधिक असल्याने अधिक खबरदारी घेण्यास सांगण्यात आले आहे. राज्याचा संसर्गदर ०.१५ टक्यांनी कमी झाला असला तरी या सातही जिल्ह्यांमधील संसर्गदर अधिक असल्याकडे अतिरिक्त मुख्य सचिव (आरोग्य) डॉ. प्रदीप व्यास यांनी लक्ष वेधले.


नवी दिल्ली - पंतप्रधान नरेंद्र मोदींनी जम्मू काश्मीरमधील सर्वपक्षीय गुपकार नेत्यांची दिल्लीत बोलावलेली बैठक तब्बल साडेतीन तास चालली. या बैठकीत या सर्वपक्षीय नेत्यांनी अनेक महत्त्वाच्या मागण्या केल्या. काँग्रेसकडून या बैठकीत सहभागी झालेल्या गुलाम नबी आझाद यांनी मोदींकडे जम्मू काश्मीरला पूर्ण राज्याचा दर्जा देण्यापासून ५ मागण्या केल्या. या बैठकीत कलम ३७० चाही मुद्दा चर्चेला आला. मात्र, सध्या हा मुद्दा सर्वोच्च न्यायालयात असल्याचे सर्व पक्षांनी मान्य केले.बैठकीनंतर गुलाम नबी आझाद म्हणाले, जम्मू काश्मीरला पूर्ण राज्याचा दर्जा पुन्हा देण्यासाठी यापेक्षा चांगली वेळ असू शकत नाही, असे सांगत आम्ही पूर्ण राज्याची मागणी केली. पंतप्रधान मोदी लोकशाहीला बळकट करण्याची भाषा करतात. सरकारने जम्मू काश्मीरमध्ये पंचायतींच्या निवडणुका घेतल्या, जिल्हा परिषदेच्याही निवडणुका घेतल्या, विधानसभा निवडणूक घेणार नाही असे कसे होऊ शकते. त्यामुळे आम्ही जम्मू काश्मीरमध्ये विधानसभा निवडणूक तातडीने करण्याची मागणी केली. निवडणुका घेऊन लोकशाही पुन्हा स्थापित केली पाहिजे.

बैठकीतील ५ प्रमुख मागण्या

१. जम्मू काश्मीरचा पूर्ण राज्याचा दर्जा परत करा

२. जम्मू काश्मीरमध्ये विधानसभा निवडणूक तातडीने घ्या

३. काश्मिरमधील पंडितांचे खोऱ्यात पुनर्वसन करा

४. राजकीय कैद्यांची अटक थांबवून तातडीने त्यांची सुटका करा

५. काश्मीरमधील व्यापार पुन्हा सुरू करा

या बैठकीत जम्मू काश्मीर भाजपचे प्रदेशाध्यक्ष देखील सहभागी होते. ते म्हणाले, ही निवडणुकांच्या दिशेनेच वाटचाल आहे. याशिवाय जम्मू काश्मीरला पूर्ण राज्याच्या दर्जाबाबतही सरकार कटिबद्ध आहे. योग्यवेळी तोही निर्णय घेतला जाईल. या बैठकीत संविधानाची, देशाविषयीची चर्चा झाल्या. प्रत्येकाने आपले दुःख सांगितले. पंतप्रधान मोदींनी देखील ते ऐकून घेतले. 

दरम्यान, या बैठकीच्या आधीच मेहबूबा मुफ्ती यांनी कलम ३७० च्या मुद्द्यावर आपली आक्रमक भूमिका मांडली होती. त्या म्हणाल्या, “भाजपच्या अजेंड्यावर कलम ३७० हटवण्याचा विषय होता, तर त्यांनी कायद्याप्रमाणे जम्मू काश्मीरच्या विधानसभेत हा विषय का ठेवला नाही. मोदी सरकारने विधानसभेला डावलून असंवैधानिकपणे कलम ३७० हटवले. सरकारला असा बेकायदेशीर आणि असंवैधानिक निर्णय घेण्याचा काहीही अधिकार नव्हता. केंद्र सरकारने बेकायदेशीरपणे कलम ३७० हटवले. आम्ही याला कायद्याने आणि संविधानाच्या मार्गाने पुन्हा प्रस्थापित करु.

जम्मू काश्मीरमधील व्यापार सुरू करण्यासाठी भारताने चर्चा केली पाहिजे. कारण हा व्यापार बंद झाल्याने अनेक लोकांचे रोजगार गेले आहेत. जम्मू काश्मीरमध्ये जी दंडेलशाही आहे, मारहाणीचे वातावरण आणि अटकसत्र सुरु आहे ते थांबवावा. कुणी काही बोलले तर युएपीए कायद्यानुसार गुन्हे दाखल केले जातात. लोकांना श्वासही घेऊ दिला जात नाही. पत्रकारांनाही त्रास दिला जात आहे. हे सर्व बंद झाले पाहिजे, असेही मत मेहबुबा मुफ्ती यांनी व्यक्त केले.

पंतप्रधान नरेंद्र मोदी आणि जम्मू काश्मीरमधील १४ नेत्यांची महत्त्वाची बैठक दिल्लीत  (२४ जून) रोजी झाली. मोदींनी काश्मीर प्रश्नावर चर्चा करण्यासाठी ८ राजकीय पक्षांच्या नेत्यांना आमंत्रित केले होते. त्यामुळे या बैठकीत कोणकोणत्या मुद्द्यांवर चर्चा होते आणि कोणता निर्णय होतो याकडे सर्वांचेच लक्ष लागले होते. या बैठकीत पंतप्रधान मोदींशिवाय गृह मंत्री अमित शाह, जम्मू काश्मीरचे राज्यपाल मनोज सिन्हा, केंद्रीय मंत्री जितेंद्र सिंह, एनएसए अजित डोभाल, नॅशनल कॉन्फरन्सचे प्रमुख फारूक अब्दुल्ला, माजी मुख्यमंत्री उमर अब्दुल्ला, पीपुल्स डेमोक्रॅटिक पार्टीच्या (पीडीपी) अध्यक्षा महबूबा मुफ्ती, माजी केंद्रीय मंत्री गुलाम नबी आजाद, काँग्रेस नेते तारा चंद, काँग्रेसचे प्रदेशाध्यक्ष गुलाम अहमद मीर हे उपस्थित होते. याशिवाय प्रधान सचिव पीके मिश्रा, गृह सचिव अजय भल्ला यांच्यासह अनेक वरिष्ठ अधिकारी देखील उपस्थित होते.


मुंबई -
मुंबई जिल्हा मध्यवर्ती सहकारी बँक, म्हणजेच मुंबै बँकेतील १२३ कोटी रुपयांच्या घोटाळ्याप्रकरणी दाखल झालेल्या गुन्ह्याच्या निमित्ताने विधान परिषदेतील विरोधी पक्षनेते प्रवीण दरेकर यांच्या अडचणीत वाढ होणार आहे.मुंबई जिल्हा नागरी सहकारी बँकेतील १२३ कोटी रुपयांच्या गैरव्यवहाराप्रकरणी मुंबई पोलिसांच्या आर्थिक गुन्हे विभागाकडे दाखल गुन्ह्याचा तपास बंद करण्यास महानगर दंडाधिकारी न्यायालयाने नकार दिला आहे. त्यामुळे, विधान परिषदेतील विरोधी पक्षनेते प्रवीण दरेकर, माजी अध्यक्ष शिवाजी नलावडे यांच्यासह इतरांच्या अडचणीत वाढ होणार आहे. तपास बंद करण्याची परवानगी मागणारा ‘सी समरी’ अहवाल स्वीकारण्यास न्याय दंडाधिकाऱ्यांनी नकार दिला आहे. मुंबै बँकेच्या मुंबईतील ठाकूर व्हिलेज, कांदिवली, दामुनगर आणि अंधेरी पूर्व येथील शाखांमध्ये बनावट कर्ज घेतल्याची माहिती उघड झाली आहे. हे कर्ज वाटप करताना कोट्यवधी रुपयांचा घोटाळा झाल्याचा आरोप आहे. प्रवीण दरेकर हे त्यावेळी मुंबै बँकेचे अध्यक्ष होते. त्यामुळे, या प्रकरणात दरेकर याचे देखील नाव आले. बँकेच्या काही सदस्यांनी नाबार्डकडे या कर्ज वाटप प्रकरणाची तक्रार केली होती. त्यानंतर चौकशी करण्यात आली असता केवळ कांदिवली पूर्व आणि अशोक वनमधील शाखांमधूनच ५५ बोगस कर्जप्रकरणे उघडकीस आली होती. प्रवीण दरेकर हे मुंबै बँकेचे २००० या वर्षापासून संचालक होते. २०१० पासून ते अध्यक्ष होते.या घोटाळ्याप्रकरणी २०१५ मध्ये विवेकानंद गुप्ता यांच्या तक्रारीवरून प्रवीण दरेकर, शिवाजी नलावडे आणि राजा नलावडे यांच्यावर गुन्हे दाखल झाले होते. १९९८ पासून १२३ कोटी रुपयांचा घोटाळा केल्याप्रकरणी हे गुन्हे दाखल करण्यात आले होते. याप्रकरणी नाबार्डने १६ फेब्रुवारी रोजी एक सविस्तर चौकशी अहवाल सादर केला आहे. नाबार्डच्या २०१८-१९ च्या अहवालात बँकेच्या कामकाजावर ताशेरे ओढण्यात आले आहेत. या अहवालानुसार, मुंबै बँकेच्या विविध शाखांमध्ये भाडे करार, आधुनिकीकरण, संगणकीकरण आणि फर्निचर खरेदीच्या व्यवहारांमध्ये गंभीर त्रुटी असल्याचे आढळून आल्याचे सांगितले जाते.


नवी दिल्ली -
जगात कोरोनाची दुसरी लाट अजून संपली नसतानाच आता तिसऱ्या लाट पसरणार असल्याचा इशारा देण्यात आला आहे. कोरोनाच्या 'डेल्टा प्लस' व्हॅरिएंटबद्दल सावधगिरी बाळगण्याचा इशारा अनेक राज्यांना केंद्रीय आरोग्य मंत्रालयाने दिला आहे.डेल्टा प्लस हा व्हॅरिएंट जगातील ९ देशांमध्ये आहे. आतापर्यंत भारतात डेल्टा प्लस व्हॅरिएंटचे २२ रुग्ण आढळले आहेत. यापैकी जास्तीत जास्त १६ महाराष्ट्रातील रत्नागिरी आणि जळगाव येथील आहेत. या व्यतिरिक्त केरळच्या पलक्कड आणि पठाणमथिट्टा जिल्ह्यात आणि मध्य प्रदेशातील भोपाळ आणि शिवपुरी जिल्ह्यात डेल्टा प्लसव्हॅरिएंटचे प्रकार समोर आले आहेत. आरोग्य मंत्रालयाच्या म्हणण्यानुसार, भारतीय SARS-CoV-2 जीनोमिक कन्सोर्टियाच्या नुकत्याच झालेल्या निष्कर्षांच्या आधारे महाराष्ट्र, केरळ आणि मध्य प्रदेश यांना या व्हॅरिएंटबाबत सावध राहण्याचा इशारा देण्यात आला आहे. डेल्टा प्रकार जगातील ८० देशांमध्ये आहे. हा व्हॅरिएंटभारतातील कोरोनाची दुसरी लाट वाढविण्यास जबाबदार असल्याचे म्हटले जाते. तर डेल्टा प्लस हा व्हेरिएंट सध्या ब्रिटन, अमेरिका, जपान, रशिया, भारत, पोर्तुगाल, स्वित्झर्लंड, नेपाळ आणि चीन या ९ देशांमध्ये आढळला आहे. सध्या ते आवडीच्या प्रकारात आहे. विषाणूचे रूप कधी बदलेल हे कोणालाही ठाऊक नसते, याचा अंदाज लावला जाऊ शकत नाही. परंतु जगात असे बरेच देश आहेत. जिथे दुसरी किंवा चौथी लाट आली नाही. सावधगिरी बाळगल्यास हे कदाचित नियंत्रणात असेल. ७ मेच्या तुलनेत देशात कोरोना रुग्णात ९० टक्के घट झाली, ही दिलासादायक बाब असल्याचे निती आयोगचे सदस्य डॉ. वीके पॉल म्हणाले.

पालघर - मुंबई महापालिकेत काम करणाऱ्या नर्सचा धावत्या ट्रेनमध्ये विनयभंग झाल्याचा प्रकार उघडकीस आला आहे. ड्युटीनंतर रविवारी रात्री शेवटच्या मेमूने घरी परतणाऱ्या तरुणीचा वाणगाव स्टेशनजवळ विनयभंग करण्यात आला. २२ वर्षीय तरुणाने नर्सचा मोबाईलही चोरी करण्याचा प्रयत्न केल्याचा आरोप आहे.तक्रारदार नर्स रविवारी रात्री आपले काम संपवून डहाणू येथील आपल्या घरी निघाली होती. विरारहून तिने रात्री १० वाजून ५० मिनिटांनी सुटणारी शेवटची मेमू (ट्रेन) पकडली. वाणगाव स्थानकाजवळ आरोपी महिला डब्यात शिरला. त्याने नर्सच्या हातातील मोबाईल हिसकावून घेण्याचा प्रयत्न केला.

नर्सने बहादुरी दाखवत त्याचा प्रतिकार केला आणि आपला मोबाईल परत मिळवला. मात्र त्यावेळी त्याने तिचा विनयभंग करण्याचा प्रयत्न केला. डहाणू स्टेशन येताच नर्सने आरडाओरडा केला. मात्र तिने सांगितलेल्या वर्णनावरुन रेल्वे पोलिसांनी सतर्कता दाखवली आणि पळून जात असलेल्या आरोपीला पकडले.तरुणावर पालघर रेल्वे पोलीस ठाण्यात चोरी आणि विनयभांगचा गुन्हा दाखल करण्यात आला आहे. त्याला न्यायालयाने दोन दिवस पोलीस कोठडी सुनावली असल्याचे पोलीस निरीक्षक योगेश देवरे यांनी सांगितले.


मुंबई - फक्त कागदोपत्री कोरोनायोद्धा म्हणण्यापेक्षा आमच्या मागण्या मान्य करा, असे म्हणत महाराष्ट्र राज्य परिचारिका संघटनेकडून आज आणि उद्या (बुधवार-गुरुवार) दिवसभर कामबंद आंदोलन पुकारले आहे. आमच्या मागण्या मान्य न झाल्यास बेमुदत आंदोलनाचा इशारा देखील परिचारिका संघटनांच्या वतीने देण्यात आला आहे.महाराष्ट्र राज्य परिचारिका संघटनेकडून आज आणि उद्या दिवसभर कामबंद आंदोलनाची हाक देण्यात आली आहे. पाठीमागचे २ दिवस परिचारिकांनी सकाळी २ तास काम बंद आंदोलन केले पण कोणत्याही मागण्या न झाल्याने आता दोन दिवस कामबंद आंदोलन असणार आहे.

सरकारने जर आमच्या मागण्या मान्य केल्या नाही तर पुढे २५ तारखेपासून बेमुदत आंदोलन सुरु करु, असा इशारा परिचारिका संघटनांनी दिला आहे. बेमुदत संपावर जाण्याआधी सरकारने आमच्या मागण्यांचा विचार करावा, असेही परिचारिका संघटनांनी म्हटले आहे.

काय आहेत परिचारिका संघटनांच्या मागण्या ?

१)कायमस्वरूपी पदभरती करा

२)केंद्राप्रमाणे आम्हाला देखील जोखीम भत्ता द्या

३)कोविड काळात ७ दिवस कर्तव्यकाळ आणि ३ दिवस अलगीकरण रजा कायम ठेवावी,

४)कोरोना काळात बंद करण्यात आलेली साप्ताहिक सुट्टी सुरू करावी… यासह अन्य काही मागण्या आहेत.

कोरोनाच्या काळात आम्ही कुठे कामात थांबलो नाही , काम केले आता सरकार मात्र आमच्या मागण्याकडे लक्ष देत नाही ही खेदाची बाब असल्याची खंत परिचारिका संघटना व्यक्त करत आहेत.राज्यातील सरकारी रुग्णालयातील नर्सकडून २१ जूनपासून आंदोलनाची हाक देण्यात आली आहे. केंद्राप्रमाणे आम्हालाही जोखीम भत्ता द्या, या प्रमुख मागणीसाठी मुंबईतील जेजे रुग्णालयातील नर्सने  कामबंद आंदोलन केले. यात जे.जे. रुग्णालयातील ३७५, सेंट जॉर्ज रुग्णालयातील १७५ आणि जीटी रुग्णालयातील १०० परिचारिका सहभागी झाल्या होत्या. त्याचसोबत राज्यभरातील सर्व शासकीय रुग्णालयांतील परिचारिकांनी सहभाग नोंदवला. या आंदोलनानंतर मागण्या मान्य झाल्या नाही तर बेमुदत आंदोलनाला सामोरे जावे लागेल, असा इशाराही त्यांनी दिला.

मुंबई - नवी मुंबई विमानतळ स्वतंत्र नाही. हा मुंबई विमानतळाचा विस्तार आहे. त्यामुळे या आंतरराष्ट्रीय विमानतळाला छत्रपती शिवाजी महाराजांचेच नाव असले पाहिजे, असे सांगतानाच शिवसेनाप्रमुख बाळासाहेब ठाकरे असते तर त्यांनीच विमानतळाला शिवाजी महाराजांचे नाव दिले असते, असे मनसेचे अध्यक्ष राज ठाकरे यांनी स्पष्ट केले. आमदार प्रशांत ठाकूर यांच्या नेतृत्वाखाली सर्वपक्षीय कृती समितीने मनसे अध्यक्ष राज ठाकरे यांची भेट घेऊन नवी मुंबई विमानतळाच्या नामकरणावर चर्चा केली. त्यानंतर पत्रकार परिषद घेऊन राज ठाकरे यांनी नवी मुंबई विमानतळाबाबतची वस्तुस्थिती मांडली. प्रशांत ठाकूर माझ्याकडे येऊन गेले. नवीन होत असलेल्या आंतरराष्ट्रीय विमानतळाला दि. बा. पाटील यांचे नाव देण्याची त्यांची मागणी आहे. सरकारची भूमिका आहे बाळासाहेबांचे नाव देण्याची. त्याच्यातून हा संघर्ष सुरु आहे. मोर्चे, धरणे सुरु आहे. माझा पाठिंबा घेण्यासाठी ते आले होते. मी वस्तूस्थिती समोर ठेवली. कोणतेही विमानतळ येते, ते शहराबाहेर येते. तेव्हाची मुंबई पकडली तर ते विमानतळ सांताक्रूझला गेले. त्यावेळी मुंबई विकसित झालेली नव्हती. मग वाढवत ते सहारपर्यंत गेले आणि मग त्याला सांताक्रुझ विमानतळ आणि सहार आंतरराष्ट्रीय विमानतळ नाव देण्यात आले, असे राज म्हणाले.मागे जेव्हा असे विमानतळ बनवायचे ठरले तेव्हा जीव्हेके कंपनीला मी विचारले हे कसले विमानतळ आहे? त्यावर आताचे विमानतळ आहे ते डोमेस्टिक असेल, आणि ते विमानतळ आंतरराष्ट्रीय असेल. आता जे विमानतळ नवी मुंबईत होत असले तरी ते मुंबई आंतरराष्ट्रीय विमानतळावरूनच टेक ऑफ होणार आहे. त्यासाठी शिवडी-न्हावाशेव रोड होत आहे. ते मुंबई आंतराराष्ट्रीय विमानतळ असल्यामुळेच त्याला छत्रपती शिवाजी महाराजांचे नाव राहणार, असे कंपनीने मला सांगितले होते, असे त्यांनी सांगितलं.मुंबई विमानतळाचे ते एक्स्टेंशन आहे नवी मुंबईत. आंतराराष्ट्रीय विमानतळाला शिवरायांचेच नाव असेल असे मला तर वाटते. विमानतळांना नाव देण्याचे वगैरे हे केंद्र सरकार ठरवते. त्यामुळे आंतरराष्ट्रीय विमानतळ हे छत्रपती शिवाजी महाराजांच्या नावानेच होईल. बाळासाहेब हे आदरणीय आहेत, दि. बा. पाटील हे ज्येष्ठ नेते होते. असे असले तरी नवी मुंबई विमानतळ हा मुंबई विमानतळाचा विस्तार असल्याने त्याला शिवरायांचे नाव देणेच उचित ठरणार आहे. नवी मुंबईत असले तरी विमानतळ हे मुंबई विमानतळ म्हणूनच ओळखलं जाणार आहे, असेही त्यांनी निदर्शनास आणून दिले.




बारामुल्ला - उत्तर काश्मीरच्या बारामुल्ला जिल्ह्यातील सोपोरमधील गुंड ब्राथ भागात सुरक्षा दलाचे जवान आणि दहशतवाद्यांमध्ये झालेल्या चकमकीत तीन दहशतवादी ठार झाले. यात बंदी घातलेल्या लष्कर-ए-​तोयबा संघटनेच्या उच्चपदस्थ कमांडरला सुरक्षा दलाने कंठस्नान घातले. शनिवारी सायंकाळी सुरक्षा दलाने दहशतवाद्यांच्या अड्ड्याला घेरल्यानंतर ही चकमक घडली.पोलीस दलातील सूत्रांनी सांगितले की, मोस्ट वॉन्टेड अतिरेकी मुदस्सीर पंडित हा सुरक्षा दलांवर झालेल्या हल्ल्यात आणि राजकीय कार्यकर्त्यांवरील अनेक हल्ल्यांमध्ये सहभागी होता. चकमकीत ठार झालेल्या आणखी एका अतिरेकीचे नाव आसार उर्फ ​​अब्दुल्ला असे असून तो पाकिस्तानचा रहिवासी आहे. तो २०१८ पासून भागात सक्रिय होता. लष्कर-ए-​तोयबाचा दहशतवादी मुदस्सीर पंडित हा ३ पोलीस, २ नगरसेवक आणि २ नागरीकांच्या हत्येत सहभागी होता, असे पोलीस निरीक्षक विजय कुमार यांना सांगितले.


पुणे - कोरोनाच्या नियमांचा भंग करत राष्ट्रवादी काँग्रेसच्या कार्यक्रमात गर्दी जमवल्याचा प्रकार समोर आला होता. याप्रकरणी पुणे शहर राष्ट्रवादी काँग्रेसचे अध्यक्ष प्रशांत जगताप यांच्यासह राष्ट्रवादी काँग्रेसच्या काही कार्यकर्त्यांना अटक करण्यात आली.पुण्यातील शिवाजीनगर परिसरात शनिवारी राष्ट्रवादी काँग्रेसच्या नवीन कार्यालयाचा उद्घाटन समारंभ पार पडला. उपमुख्यमंत्री अजित पवार यांच्या हस्ते या नवीन कार्यालयाचे उद्घाटन झाले. कार्यक्रमाला राष्ट्रवादी काँग्रेसचे पुणे शहर पदाधिकारी आणि कार्यकर्ते मोठ्या संख्येने उपस्थित होते. दरम्यान, जमलेल्या गर्दीवर पोलीस काय कारवाई करणार? याची चर्चा सोशल मीडियात सुरू झाली. यादरम्यान, कोरोना नियमांचे उल्लंघन केल्याप्रकरणी राष्ट्रवादी काँग्रेसचे पुणे शहराध्यक्ष प्रशांत जगताप यांच्यासह १०० ते १५० कार्यकर्त्यांविरोधात शिवाजीनगर पोलीस ठाण्यात गुन्हा दाखल करण्यात आला आहे.पुणे शहराध्यक्ष प्रशांत जगताप, राष्ट्रवादी काँग्रेसचे युवक अध्यक्ष महेश रमेश हांडे, प्रदेश कार्यकारिणी सदस्य प्रदीप देशमुख, माजी नगरसेवक निलेश निकम, बाळासाहेब बोडके, सरचिटणीस रोहन पायगुडे यांच्यासह १०० ते १५० अनोळखी महिला आणि पुरुष यांच्याविरोधात हा गुन्हा दाखल करण्यात आला आहे. याप्रकरणी पोलीस अंमलदार दिनेश वीर यांनी फिर्याद दिली आहे. भादवी कलम १८८, २६९, २७० राष्ट्रीय आपत्ती व्यवस्थापन कायदा २००५ चे कलम ५१ ब, महाराष्ट्र कोविड १९ उपाययोजना २०२०चे कलम ११ प्रमाणे हा गुन्हा दाखल करण्यात आला आहे. सार्वजनिक कार्यक्रमासाठी शासन क्षमतेच्या ५० टक्के क्षमतेने परवानगी असताना राष्ट्रवादी काँग्रेसच्या या कार्यक्रमात मात्र मोठ्या संख्येने गर्दी झाली होती. राष्ट्रवादी काँग्रेसच्या या कार्यक्रमात ४०० ते ५०० कार्यकर्ते सहभागी झाले होते. यातील अनेकांनी मास्क घातले नव्हते. त्यामुळे इतक्या मोठ्या संख्येने कोरोना नियमांचे उल्लंघन होऊनही कारवाई का नाही? असा प्रश्न नागरिकांमधून विचारला जात होता.


मुंबई - मराठा आरक्षणासंदर्भात मराठा समाजाच्या वतीने २०१७ पासून मूक आंदोलने सुरू आहेत. ५७ मूक अंदोलनाच्या माध्यमातून गेले ३ वर्ष मराठा आरक्षणाची मागणी केली जात आहे. परंतू हा प्रश्न अजून ही प्रलंबीत आहे. मराठा मूक अंदोलनाची पुढील दिशा २१ जूनला समन्वयकांशी चर्चा करून ठरवणार असल्याची, माहिती खासदार संभाजीराजे भोसले यांनी सह्याद्री अतिथीगृहात आयोजित पत्रकार परिषदेत दिली. दरम्यान, मराठा आरक्षणासंदर्भातील सुप्रीम कोर्टाच्या निकालाबाबत राज्य सरकार आठवडाभरात पुनर्विचार याचिका दाखल करणार असल्याचे ते म्हणाले. मुख्यमंत्री उद्धव ठाकरे आणि खासदार संभाजीराजे भोसले यांच्यात गुरुवारी महत्वपूर्ण बैठक झाली. तब्बल दीड तास झालेल्या बैठकीत राज्य सरकार मराठा समाजाच्या मागण्यांबाबत सकारात्मक असल्याचे संभाजीराजे यांनी सांगीतले. कोल्हापूरमध्ये सुरु झालेले मूक आंदोलन सुरुच राहणार आहे. हे आंदोलन ३६ जिल्ह्यांमध्ये घेऊन जाण्याचा आमचा निर्धार आहे. राज्य सरकारशी झालेल्या चर्चेत त्यांनी आंदोलन थांबवण्याबाबत विनंती केली. मात्र आम्ही आंदोलन मागे घेणार नाही. सरकारशी चर्चा सुरु आहे. नाशिकला सर्व समन्वयकांशी चर्चा करुन पुढील दिशा ठरवली जाणार आहे. असे खासदार संभाजीराजे म्हणाले. नाशिकला २१ जूनला सकल मराठा समाजाच्यावतीने मूक आंदोलन करण्यात येणार आहे.सारथी हे सगळ्याचे हृदयस्थान आहे. सारथीच्या माध्यमातूनच आपण मराठा समाजाला पायावर उभे करु शकतो. अधिकारी वर्गाकडून योग्य रित्या काम होत नसल्याचे त्यांनी मान्य केले. येत्या शनिवारी त्याबाबत पुण्यात बैठक होणार आहे. माझी अपेक्षा आहे की शनिवारी सारथीच्या चेअरमननी पैशाची मागणी करावी. सरकारने लागेल तेवढा पैसा देण्याची तयारी दर्शवली आहे. समाजासाठी जे लोक योगदान देत आहेत असे लोक घेण्याची तयारी सरकारने दाखवली आहे. असे देखील संभाजीराजे म्हणाले.याशिवाय राज्य सरकारसोबतच्या बैठकीत २०१४ पासूनच्या विद्यार्थ्यांच्या नियुक्त्यांचा प्रश्न, मराठा आरक्षण आंदोलनातील १ गुन्हा वगळता इतर गुन्हे मागे घेण्याचा निर्णय झाल्याचे त्यांनी सांगितले. मराठा आरक्षणासंदर्भात एक समिती देखील स्थापन केली जाईल, असे सरकारने सांगितल्याचे संभाजीराजे म्हणाले.

मुंबई - मनसुख हिरेन मृत्यू प्रकरणी एनआयएने गुरुवारी मुंबई पोलिसांतील माजी एन्काउंटर स्पेशालिस्ट प्रदीप शर्मा यांच्यासह तीन जणांना अटक केली आहे. त्यानंतर प्रदीप शर्मा यांना एनआयएच्या विशेष न्यायालयापुढे हजर करण्यात आले होते. यावेळी न्यायालयाने त्यांना २८ जूनपर्यंत एनआयए कोठडी सुनावली आहे. दरम्यान, एनआयएकडून प्रदीप शर्मा यांच्या अंधेरीतील जे. बी. नगर निवास स्थानी छापेमारी करण्यात आली. ही छापेमारी जवळपास ४ ते ५ तास चालली. यावेळी काही महत्त्वाचे कागदपत्रे ताब्यात घेतल्याची माहिती आहे.'मनसुख हिरेन यांच्या हत्येच्या कटामध्ये या तिघांचा सहभाग होता. हे तिघेही सचिन वाजेंसोबत मिळून हा गुन्हा केला आहे. सचिन वाजे आणि प्रदीप शर्मा या दोघांनी कट रचून मनसुखच्या हत्येनंतर पुरावे नष्ट केले आहेत.' असा युक्तीवाद एनआयएच्या वकिलांकडून करण्यात आला. तसेच आत्तापर्यंत अटक केलेले सर्व आरोपी हे या प्रकरणानंतर एकमेकांच्या संपर्कात होते. तसेच प्रदीप शर्मा हे निवृत्त पोलीस अधिकारी आहेत. त्यांच्या घरातून एक पिस्तूल जप्त करण्यात आली आहे. या पिस्तूलच्या लायसनची मुदत संपली असल्याचेही एनआयएतर्फे सांगण्यात आले.दरम्यान, आरोपींच्या वकीलांकडून एनआयएने लावलेल्या सर्व आरोपांचे खंडन करण्यात आले. तसेच आरोपी तपासात सहकार्य करत असल्याचेदेखील आरोपीच्या वकिलांकडून सांगण्यात आले. एनआयएने यापूर्वी आरोपींना चौकशीसाठी बोलवले होते. त्यावेळीही आरोपी उपस्थित होते, असा युक्तीवाद आरोपींच्या वकिलांकडून करण्यात आला. यावेळी प्रदीप शर्मा भावूक झाल्याचे दिसून आले. तसेच 'माझा आणि सचिन वाजेचा काहीही संबंध नसून अटकेत असलेला संतोष माझा जुना खबरी आहे, बाकी अटक केलेल्या आरोपींना मी ओळखत नाही, असे प्रदीप शर्मा यांनी न्यायालयात सांगितले.

मुंबई - मनसूख हिरेन हत्या‌ प्रकरणी एन्काउंटर स्पेशालिस्ट प्रदीप शर्मा यांच्या अडचणीत वाढ झाली आहे. एनआयएकडून रात्री उशिरा प्रदीप शर्मा यांच्या घराची झडती घेण्यात आली. तसेच शर्मा यांना ताब्यात घेण्यात आले आहे. यापूर्वी दोन वेळा शर्मा यांची एनआयने चौकशी केली होती.उद्योगपती मुकेश अंबानी यांच्या अँटिलिया इमारतीच्या बाहेर सापडलेल्या स्कॉर्पिओ गाडीतील स्फोटकांच्या संदर्भात राष्ट्रीय तपास यंत्रणेकडून तपास केला जात आहे. यामध्ये मुंबई पोलीस खात्यातील क्राइम ब्रांचच्या अधिकाऱ्यांना यापूर्वी अटक करण्यात आली होती. या कारवाईत क्राईम ब्रांचचा बडतर्फ अधिकारी सचिन वाझे यास राष्ट्रीय तपास यंत्रणेने सर्वात पहिली अटक केली होती. त्यानंतर एन्काऊंटर स्पेशालिस्ट माजी पोलीस अधिकारी प्रदीप शर्मा यांच्या अंधेरी स्थित घरावर गुरुवारी राष्ट्रीय तपास यंत्रणेने छापेमारी केली आहे.याआधी पकडण्यात आलेल्या दोन आरोपींमध्ये संतोष शेलार व आनंद जाधव या आरोपींची चौकशी करण्यात आली होती. या प्रकरणातील आणखीन एक व्यक्ती मनसुख याची ज्या टवेरा गाडीमध्ये हत्या करण्यात आली होती, त्या गाडीला राष्ट्रीय तपास यंत्रणेकडून मुंबईतील गोरेगाव परिसरातून जप्त करण्यात आले होते. या गाडीचा मालक आनंद जाधव असून गाडीचा चालक हा संतोष शेलार असल्यामुळे या दोघांच्या चौकशीनंतर माजी पोलीस अधिकारी प्रदीप शर्मा यांच्या घरावर राष्ट्रीय तपास यंत्रणेने छापेमारी केली आहे.सूत्रांकडून मिळालेल्या माहितीनुसार संतोष शेलार व आनंद जाधव यांच्यात चौकशीदरम्यान त्यांनी कबूल केले आहे की सचिन वाझेकडून त्यांची भेट प्रदीप शर्मा सोबत झाली होती. ही भेट मुंबईतील अंधेरी परिसरामध्ये झाली असल्याचेही तपासात समोर आलेला आहे. त्यामुळे आता पुन्हा एकदा राष्ट्रीय तपास यंत्रणेच्या रडारवर माजी पोलीस अधिकारी प्रदीप शर्मा आले आहेत. एन्काऊंटर स्पेशलिस्ट अशी ओळख असलेले प्रदीप शर्मा यांनी ३१२ एन्काऊंटरमध्ये भाग घेत १०० हून अधिक गुंडांचे एन्काऊंटर केले आहेत. शर्मा यांचा जन्म जरी उत्तर प्रदेशात झाला असला तरी त्यांचे शिक्षण महाराष्ट्रातल्या धुळे येथे पूर्ण झाले. एमएससी पर्यंत शिक्षण पूर्ण केल्यानंतर प्रदीप शर्मा १९८३ मध्ये पोलीस सेवेत रुजू झाले. मुंबईतल्या माहिम पोलीस ठाण्यात उपनिरीक्षक पदावर नियुक्त झालेल्या प्रदीप शर्मांनी अल्पावधीतच वरिष्ठ पोलीस निरीक्षकापर्यंत बढती मिळवली. कुख्यात गुंडांशी संबंध असल्याच्या संशयावरून प्रदीप शर्मांना २००८ मध्ये सेवेतून निलंबीत करण्यात आले. मात्र, सबळ पुराव्याअभावी प्रदीप शर्मांना क्लीनचिट मिळाली. ९ वर्षांच्या दिर्घ कालावधीनंतर २०१७ मध्ये प्रदीप शर्मा पोलीस सेवेत पुन्हा रूजू झाले. प्रदीप शर्मा यांनी दाऊद इब्राहिमचा भाऊ इकबाल कासकरला अटक केली. त्यांनंतर विधानसभेच्या तोंडावर प्रदीप शर्मांनी तडकाफडकी राजीनामा दिला होता. यावेळी उद्धव ठाकरे यांनी प्रदीप शर्मा यांना विधानसभा निवडणुकीच्या उमेदवारीचा शिवसेनेचा अधिकृत अर्ज दिला होता.

पाटणा (बिहार) - केंद्रीय मंत्रिमंडळाच्या विस्ताराची जोरदार चर्चा आहे. उत्तरप्रदेश विधानसभा निवडणुकीच्या आधी केंद्रीय मंत्रिमंडळाचा विस्तार होणार आहे. बिहारमधूनही अनेक जण मंत्रिपदासाठी दावेदार आहेत. जनता दलही (संयुक्त) यावेळी मंत्रिमंडळात आपली दावा करत आहे. जेडीयूमधून ललन सिंह, आरसीपी सिंह आणि संतोष कुशवाहा यांच्या नावाची चर्चा आहे.यावेळी सुशील मोदींसारखे भाजपामधील मोठे नेते मंत्रिपदाचे दावेदार आहेत. याशिवाय, लोक जनशक्ती पक्षातूनही एकाला मंत्रिपद दिले जाऊ शकते. भाजपचे लक्ष्य उत्तरप्रदेश विधानसभा निवडणुकीवर आहे. तेथील सामाजिक समिकरणेही भाजपला लक्षात घ्यावे लागतील, असे तज्ञांचे म्हणणे आहे. जेडीयूचे राष्ट्रीय अध्यक्ष आरसीपी सिंह म्हणत आहेत की, केंद्रीय मंत्रिमंडळ विस्तारात जेडीयूचा समावेश करण्यात येईल. मात्र, किती जणांना आणि कोणाकोणाला मंत्रिपद मिळेल, याबाबत बोलणे त्यांनी टाळले. ते म्हणाले, राष्ट्रीय लोकशाही आघाडीमध्ये (एनडीए) सर्वांचा सन्मान केला जातो.वरिष्ठ पत्रकार रवि उपाध्याय म्हणाले की, जेडीयूतून ललन सिंह, आरसीपी सिंह और संतोष कुशवाहा यांच्या नाव पुढे केले जाऊ शकते. ललन सिंह बिहारचे मुख्यमंत्री नीतीश कुमार यांच्या जवळचे आहेत. त्यांच्या नावाची चर्चा खूप आधीपासून आहे. तर दुसरीकडे जेडीयूचे राष्ट्रीय अध्यक्ष आरसीपी सिंह हेदेखील केंद्रीय मंत्रिपदाचे दावेदार आहेत. नीतीश कुमार संतोष कुशवाहा यांनादेखील पक्षाकडून संधी देऊ शकतात, असेही ते म्हणाले.सुशिल मोदी बिहार भाजपचे मोठे नेते आहेत. तेदेखील मंत्रिपदाचे दावेदार आहेत. जर त्यांचा समावेश केंद्रीय मंत्रिमंडळात केला गेला तर बिहारला त्याचा फायदा होईल. तसेच सामाजिक समिकरणे पाहता दिवंगत रामविलास पासवान यांचे भाऊ पशुपति पारस यांच्यारुपाने मोठ्या दलित चेहऱ्याचाही विचार केला जाण्याची शक्यता असल्याचे रवि उपाध्याय यांनी सांगितले. तर भाजपचे प्रवक्ते विनोद शर्मा म्हणाले की, जेव्हा मंत्रिमंडळाचा विस्तार होईल, तेव्हा अनेक जणांना संधी मिळेल. जेडीयूचा मागच्या वेळेत समावेश झाला नव्हता. यावेळी मंत्रिमंडळ विस्तारात जेडीयूचा समावेश करण्यात येईल. तर बिहार भाजपाचे नेते सुशिल मोदींनाही संधी देण्याची शक्यता आहे. बिहार भाजपच्या कार्यकर्ते, पदाधिकारी यांची इच्छा आहे की, सुशिल मोदींना केंद्रात मंत्रिपद मिळावे, असेही भाजप प्रवक्ते विनोद शर्मा यांनी सांगितले.बिहारमध्ये भाजपचे १७ खासदार आहेत. यातील पाच जणांना मंत्रिपद देण्यात आले आहे. तर जेडीयूचे १६ खासदार आहेत. केंद्रीय मंत्रिमंडळात जेडीयूला यावेळी किती पदे मिळतात, हे पाहणे महत्त्वाचे आहे. जेडीयूला दोन ते तीन मंत्रिपदे मिळण्याची शक्यता आहे. लोजपमध्ये झालेल्या बंडखोरीनंतर केंद्रीय मंत्रिमंडळात पशुपति पार आणि चिराग पासवान यांच्यापैकी कोणाला संधी मिळते हे पाहणे औत्सुक्याचे ठरणार आहे. जेडीयूच्या नेत्यांनी आधीच चिराग पासवान यांच्याप्रती आपली नाराजी व्यक्त केली आहे. मात्र, भाजप नेत्यांची चिराग पासवान यांच्या नावाला पसंती आहे. मात्र, तरीही जेडीयूच्या नाराजीमुळे चिराग पासवान यांचा मंत्रिमंडळात समावेश करणे, हे भाजपसाठी सोपे नाही.जेडीयू आणि भाजप २००५ पासून बिहारमध्ये सत्तेत आहेत. मात्र, वाजपेयी सरकार में जेडीयूला संख्याबळानुसार जागादेखील मिळाल्या होत्या. मात्र, २०१४ मध्ये नरेंद्र मोदींच्या नेतृत्वात सरकार आल्यानंतर जेव्हा सरकार बनले तेव्हा जेडीयू बिहारमध्ये भाजपसोबत नव्हती.२०१७ मध्ये त्यांनी पुन्हा भाजपसोबत हातमिळवणी करत सरकार बनवले. मात्र, यानंतर त्यांना केंद्रीय मंत्रिमंडळात स्थान देण्यात आले नव्हते. यानंतर २०१९ च्या लोकसभा निवडणुकीत भाजपला पुन्हा बहुमत मिळाले. यावेळी जेडीयू केवळ एक मंत्रिपद देण्यात येत होते.


मुंबई - मुंबई महापालिकेने परदेशात जाणाऱ्या विद्यार्थी, नोकरदार आणि खेळाडूंना दिलासा देण्यासाठी महत्त्वपूर्ण पाऊल उचलले आहे. या सर्वांना आता कोविशिल्ड लसीच्या दुसऱ्या डोससाठी ८४ दिवसांची वाट पाहावी लागणार नाही. त्यांना आता पहिल्या डोसनंतर २८ दिवसांनी दुसरा डोस घेता येणार आहे. ही सवलत ३१ ऑगस्ट २०२१ पर्यंत असणार आहे. मुंबई महापालिकेने याबाबत मार्गदर्शक सूचना जारी केल्या आहेत

लसीकरणासाठीची आवश्यक कागदपत्रे -

१) परदेशी शिक्षण घेण्यास जाणाऱ्या विद्यार्थ्यांसाठी परदेशी विद्यापिठाचे प्रवेश निश्चिती पत्र, परदेशी व्हिसा, परगेशी व्हिसा मिळण्यासाठी संबंधीत विद्यापिठाचे I-20किंवा DS – 160 फॉर्म

२) परदेशात शिकणाऱ्या विद्यार्थ्यांना भारतात येऊन पुन्हा शिक्षण पूर्ण करण्यासाठी परदेशात जायचे असल्यास संबंधित विद्यापिठ किंवा अभ्यासक्रमाशी संबंधित असलेली अधिकृत कागदपत्रे

३) नोकरीसाठी परदेशात जाणाऱ्यांकडे संबंधित कंपनीचे ऑफर लेटर, मुलाखतीचे पत्र, पुन्हा नोकरीसाठी परदेशात जाणाऱ्यांना एम्प्लॉयर लेटर

४) टोकियो ऑलम्पिकमध्ये भाग घेणारे खेळाडू किंवा अधिकारी यांच्याकडे क्रिडा मंत्रालयाचे अधिकृत पत्र असणे अनिवार्य

परदेशात जाणारे विद्यार्थी, नोकरदार, खेळाडू यांना लस घेतल्याचे प्रमाणपत्र देतांना त्यावर पारपत्राचा क्रमांक नमुद करणे आवश्यक आहे. जर पहिला डोस घेते वेळी पुरावा म्हणून पारपत्र दाखवले नसेल तर लसीकरण अधिकाऱ्यांना केवळ पारपत्राचा आग्रह न धरता वेगळे प्रमाणपत्र देता येईल.

लसीकरण केंद्रावरील नोडल अधिकाऱ्यांना परदेशी जाणाऱ्यांसाठीच्या लसीकरणाचा नमुना फॉर्म भरुन घेऊन कोविड पोर्टलवर अपलोड करावा लागेल.

जागतिक आरोग्य संघटनेनं कोविशील्ड लस आपातकालिन वापरासाठी मान्य केल्याने लसीकरण प्रमाणपत्रात या कोविशील्ड लसीचा उल्लेख आंतरराष्ट्रीय प्रवासासाठी पुरेसा राहिल.


मुंबई - शिवसेना नेते आणि मंत्री आदित्य ठाकरे यांच्या वरळी मतदारसंघात शिवसेनेचे पदाधिकारी मराठी ठेकेदाराला फोन करून धमकावत असल्याचा आरोप मनसेने केला आहे. याबाबत मनसेच्या कार्यकर्त्यांनी म्हाडा अधिकाऱ्याला जाब विचारत त्यांच्या तोंडाला काळे फासले आहे.काव्या इंटरप्रायजेस या कंपनीला वरळी येथील १ कोटी १९ लाखांच्या कामाचे कंत्राट मिळाले होते. त्यासाठी ८ ऑक्टोबर २०२० या कामाचे वर्क ऑर्डर काढण्यात आले. तसेच शिवडी विभागात २० लाख ७१ हजारांची कामे मिळाली. या कामाच्या सिमेंट चाचणीचा रिपोर्टही झाला. काव्या इंटरप्रायजेसने शासनाच्या नियमांप्रमाणे ई निविदा भरून कंत्राट मिळवले होते. परंतु टक्केवारीसाठी मराठी कंत्राटदाराला काम करू न देता शिवसेनेचे एजेंट काम रद्द करण्यासाठी धमकावण्याचा फोन करत होते, असा आरोप मनसेने केला आहे.वरळी विभागाचे माजी आमदार सुनील शिंदे यांच्या नावाने धमकी देण्यात येत होती. वारंवार पाठपुरावा करूनही म्हाडाचे अधिकारी दबावात येऊन व टक्केवारीसाठी काम करू देत नव्हते. तसेच कंपनीने वारंवार पत्र व्यवहार करूनही म्हाडाकडून चालढकल करण्यात येत होती. यावरून मनसेच्या कार्यकर्त्यांनी आक्रमक पवित्रा घेतला. मराठी माणसाने मुंबईमध्ये काम करायचे नाही का? असा सवाल करत, मनसेच्या कार्यकर्त्यांनी अधिकाऱ्यांच्या अंगावर कागदपत्रे भिरकावली व घोषणा देत त्यांच्या तोंडाला काळे फासले.

मुंबई - महाविकास आघाडी सरकारच्या वतीने राज्यपाल नियुक्त १२ सदस्यांच्या नावाची यादी ६ नोव्हेंबर २०२०ला राज्यपाल यांना सादर केली होती. यादी सादर करुन ७ महिने उलटले तरीही राज्यपालांनी नियुक्ती केलेली नाही. त्यामुळे महाविकास आघाडी विरुद्ध राज्यपाल असा संघर्ष निर्माण झाला आहे. महाविकास आघाडी सरकारने विधानपरिषद सदस्य नेमणूक करण्यासाठी ज्या १२ लोकांची नावे पारित करुन राज्यपालाकडे मंजुरीसाठी पाठविली होती, ती यादी माहिती अधिकारात उपलब्ध नसल्याची माहिती आरटीआय कार्यकर्ते अनिल गलगली यांस दिली होती. यावर आज राज्यपालांच्या उपसचिव असलेल्या प्राची जांभेकर यांनी सुनावणी घेतली. यावेळी राज्यपालांकडे यादीसहित संपूर्ण माहिती असल्याचे समोर आले आहे.

अनिल गलगली यांनी या माहितीबाबत प्रथम अपील दाखल केले होते त्यामुळे आज राज्यपालांच्या उपसचिव असलेल्या प्राची जांभेकर यांनी सुनावणी घेतली. सुनावणीत अनिल गलगली यांनी यादी उपलब्ध नसल्यास ती यादी नेमकी कोणाकडे उपलब्ध आहे?, असा सवाल केला. त्यावर, राज्यपालांकडे यादीसहित संपूर्ण माहिती आहे. निर्णय झाल्यावर माहिती उपलब्ध करून देण्यात येईल, असे प्राची जांभेकर यांनी सांगितले. त्या पुढे म्हणाल्या, की सध्या हे प्रकरण न्यायप्रविष्ट असल्याने माहिती द्यावी की नाही? याबाबत सल्लामसलत केली जाईल. असे उत्तर राज्यपाल भवणाकडून आरटीआय कार्यक्रते अनिल गलगली यांना मिळाले आहे.आरटीआय कार्यकर्ते अनिल गलगली यांनी राज्यपाल सचिवालयाकडे दिनांक २२ एप्रिल २०२१ रोजी माहिती विचारली होती की, मुख्यमंत्री सचिवालयातर्फे राज्यपाल नियुक्त विधानपरिषदेवर सदस्य नेमणुकीबाबत राज्यपाल महोदयांकडे सादर केलेली यादी देण्यात यावी. तसेच मुख्यमंत्री सचिवालयातर्फे राज्यपाल नियुक्त विधानपरिषदेवर सदस्य नेमणुकीबाबत राज्यपाल महोदयांकडे सादर केलेल्या प्रस्तावाची सद्यस्थितीची माहिती देण्यात यावी. अनिल गलगली यांच्या अर्जावर १९ मे २०२१ ला राज्यपाल सचिवालयाचे अवर सचिव जयराज चौधरी यांनी उत्तर देत कळविले, की राज्यपाल नियुक्त विधान परिषद सदस्यांची यादी जन माहिती अधिकारी (प्रशासन) यांच्या कार्यालयात उपलब्ध नसल्याने, आपणांस उपलब्ध करुन देता येत नाही.

कोलकाता -  मुकुल रॉय यांनी आपला मुलगा शुभ्रांशु रॉय यांच्यासह पुन्हा तृणमूल काँग्रेसमध्ये प्रवेश केला. मुकुल रॉय हे ममता बॅनर्जी यांच्या उपस्थितीत तृणमूलमध्ये सामील झाले. तृणमूल काँग्रेसमध्ये प्रवेश केल्यानंतर मुकुल रॉय यांनी सध्याच्या परिस्थितीत कोणीही भाजपामध्ये राहू शकत नाही, अशी प्रतिक्रिया दिली. भाजपाचे आणखी बरेच नेते पक्षाला रामराम ठोकणार असल्याच्या चर्चांना उधाण आहे.तृणमूल काँग्रेसमध्ये पुन्हा प्रवेश घेतल्यानंतर पत्रकारांशी बोलताना मुकुल रॉय म्हणाले की, मी भाजपा सोडला आणि टीएमसीमध्ये आलो आहे. बंगालमध्ये जी परिस्थिती आहे, अशा परिस्थितीत कोणीही भाजपमध्ये राहणार नाही. माध्यमांच्या वृत्तानुसार, तृणमूल काँग्रेसमध्ये पश्चिम बंगाल भाजपामधील अनेक बडे नेते प्रवेश करणार आहेत. तृणमूल काँग्रेसमध्ये मोठ्या संख्येने नवनिर्वाचित भाजपा आमदार जाण्याची शक्यताही व्यक्त केली जात आहे. तथापि, तृणमूल सुप्रीमो ममता बॅनर्जी यांनी हे स्पष्ट केले आहे की, ज्या लोकांनी तृणमूल सोडले आणि निवडणुकीपूर्वी ताबडतोब भाजपामध्ये प्रवेश केला, त्यांना पुन्हा पक्षात समाविष्ट केले जाणार नाही.रॉय यांनी टीएमसीत प्रवेश केल्यानंतर ‘घर का लडका घर वापस आया है,’ अशी प्रतिक्रिया ममता बॅनर्जी यांनी दिली. मुकुल यांची घरवापसी झाली आहे. निवडणूक प्रचारादरम्यानही मुकुल रॉय विरोधात बोलले नाहीत. त्यांच्यासोबत कधीही मतभेद नव्हते, असे ममता म्हणाल्या. मुकुल रॉय यांना भाजपामध्ये धमक्या येत असत, ज्याचा त्यांच्या आरोग्यावरही मोठा परिणाम झाला, असे ममतांनी सांगितले. तसेच रॉय यांची आता तृणमूलमध्ये असलेली भूमिका ममतांनी स्पष्ट केली. मुकुल रॉय यांनी यापूर्वीही महत्वाची भूमिका साकारली होती. भविष्यातही तीच भूमिका राहील. तृणमूल एक कुटुंब आहे, असे ममता म्हणाल्या.दरम्यान, भाजपा सोडल्यानंतर मुकुल रॉय आपल्या जुन्या मित्रपक्षांच्या लक्ष्य स्थानी आले आहेत. पश्चिम बंगालमधील बराकपूरचे भाजपा खासदार अर्जुन सिंह यांनी मुकुल रॉय यांच्या तृणमूल काँग्रेस प्रवेशावर प्रतिक्रिया दिली. अभिषेक बॅनर्जी यांचा राजकारणात उदय झाला. तेव्हा मुकुल यांना टीएमसीने घराबाहेर हाकलले. त्यानंतर ते भाजपामध्ये आले. आता पुन्हा टीएमसीत गेले आहेत. त्यांची अवस्था आयाराम-​गयाराम सारखी झाली आहे, असे अर्जुन सिंह म्हणाले.

मुंबई - निर्माता मधु मंटेना यांचा ‘रामायण’ हा चित्रपट या दिवसांमध्ये खूप चर्चेत आला आहे. माध्यम अहवालानुसार या चित्रपटात दीपिका पदुकोण,हृतिक रोशन आणि दक्षिणचा स्टार महेश बाबू मुख्य भूमिकेत दिसणार आहेत. जर, या अहवालांवर विश्वास ठेवला तर, हृतिक रोशनच्या या चित्रपटात रावणच्या भूमिकेत दिसणार आहे. तथापि, निर्मात्यांनी अद्याप मुख्य कलाकारांविषयी कोणतीही अधिकृत घोषणा केलेली नाही. हा चित्रपट खास बनवण्यासाठी मेकर्स परिश्रम घेत आहेत. रावणाचे पात्र अधिक उठावदार होण्यासाठी त्याच्या लूकची खास पद्धतीने रचना करण्याची तयारी सुरू आहे. या अहवालांनुसार, यूएस बेस्ड कॉस्च्युम टीम हृतिकच्या या लूकसाठी विशेष मेहनत घेणार आहे. ही तीच टीम आहे, ज्यांनी ‘अवतार’ चित्रपटासाठी पोशाख डिझाईन केले होते. मेकर्स आणि टीममधील हा करार फायनल झाला, तर ही टीम हृतिक रोशनसाठी खास रावणच्या लूकची रचना करेल.

मधु मंटेना यांच्या ‘रामायण’ या चित्रपटाचे बजेट सुमारे ५०० कोटी असल्याचे म्हटले जात आहे. या चित्रपटाचे चित्रीकरण ३ डी तंत्रज्ञान वापरून करण्यात येणार आहे. मधु मंटेना, नील मल्होत्रा ​​आणि अल्लू अरविंद या चित्रपटाची निर्मिती करत आहेत. हिंदी व्यतिरिक्त हा चित्रपट तामिळ आणि तेलगू भाषेत देखील प्रदर्शित होणार आहे.  या आधी या चित्रपटातील ‘रामा’च्या भूमिकेसाठी निर्माते मधु मंटेना यांनी प्रभासकडेही संपर्क साधला होता. परंतु, ओम राऊत यांच्या ‘आदिपुरुष’ चित्रपटात तो आधीपासूनच ‘रामा’ची भूमिका साकारत आहे. ‘आदिपुरुष’ची घोषणा झाल्यानंतर, लगेचच मधु मंटेनाने ‘रामायण ३ डी’ची घोषणा केली. चित्रपटासाठी त्याला निर्माते देखील मिळाले आहेत. ‘रामायण’ चित्रपटाची टीम एका अशा सुपरस्टारचा शोध घेत आहे, जो ‘रामा’ची भूमिका उत्तम प्रकारे साकारू शकेल आणि त्यांच्या मते, महेश बाबू या भूमिकेत चपखल बसेल.

स्पॉटबॉयच्या म्हणण्यानुसार, मधु मंटेनाने, अनुराग कश्यप, विक्रमादित्य मोटवानी आणि विकास बहल यांच्याकडून फँटम फिल्म्सची हिस्सेदारी खरेदी केली आहे. आता फँटम फिल्म तो एकट्याने चालवणार आहे. फँटम फिल्म्सच्या बॅनरखाली तो आपला ड्रीम प्रोजेक्ट बनवणार असल्याचे सांगण्यात येत आहे. असेही म्हटले जात आहे की, मधु मंटेना त्यांचा ‘रामायण’ हा चित्रपट दोन भागात प्रदर्शित करणार आहे. कारण, इतक्या मोठ्या महाकाव्याची कथा एका चित्रपटाच्या माध्यमातून दाखवणे कठीण आहे.

मुंबई - कोरोनाच्या दुसऱ्या लाटेमुळे सरकारने इयत्ता बारावीच्या परीक्षा रद्द करण्याचा निर्णय घेतला आहे. यासंबधीचा अधिकृतरित्या शासन निर्णय जारी करण्यात आला आहे. सुधारित मूल्यमापनाचे धोरण व निकालाची तारीख मंडळामार्फत लवकरच जाहीर करण्यात येईल, अशी माहिती शालेय शिक्षण मंत्री वर्षा गायकवाड यांनी दिली आहे. कोरोनाची सध्याची परिस्थिती, वेगवेगळ्या आजारांचे मुलांवर होणारे परिणाम पाहता विद्यार्थ्यांच्या मनात तणाव वाढलेला आहे. या पार्श्वभूमीवर बारावीच्या परीक्षा रद्द करण्याचा निर्णय घेतला आहे. तसेच, यासंबधीचा अधिकृतरित्या शासन निर्णय जारी करण्यात आला आहे. इयत्ता बारावीच्या परीक्षेचे महत्त्व लक्षात घेता मूल्यमापनाचे एकसमान सूत्र निश्चित करावे, अशी मागणी केंद्राकडे करण्यात आली होती. सीबीएसई आणि आयसीएसईच्या परीक्षा रद्द केल्याच्या पार्श्वभूमीवर राज्य मंडळाच्या परीक्षाही रद्द करण्यात आल्या आहेत. सर्व संबंधित घटकांशी केलेल्या चर्चेनंतर सध्याचे वातावरण परीक्षेसाठी पोषक नसल्याने, परीक्षा रद्द करून पर्यायी मूल्यमापनाच्या आधारे निकाल घोषित करावा, असे महाराष्ट्र शासनाने केंद्राला यापूर्वीच सुचवले होते, असेही शालेय शिक्षण मंत्री वर्षा गायकवाड यांनी सांगितले आहे. बारावीची परीक्षा रद्द करण्याच्या निर्णयामुळे बारावीचे १४ लाख विद्यार्थी कोरोनाच्या संभाव्य धोक्यापासून दूर राहणार आहेत. सीबीएसई, आयसीएसई बारावीच्या परीक्षा रद्द करण्याचा निर्णय घेतला आहे. मात्र, बारावीच्या परीक्षांचे मूल्यांकनाचे चित्र अद्यापही स्पष्ट झालेले नाही. शालेय शिक्षण मंत्र्यांनी मूल्यमापनाच्या आधारे निकाल घोषीत करण्याच्या सूचना केंद्र सरकारला पाठवल्या आहेत. त्यामुळे आता निकलाबाबाद केंद्र सरकार जो निर्णय घेईल, त्यावर महाराष्ट्र बोर्डाच्या बारावीचा निकाल लावण्याचा निर्णय घेणार असल्याची माहिती समोर आली आहे.

nagrikvarta

{facebook#YOUR_SOCIAL_PROFILE_URL} {twitter#YOUR_SOCIAL_PROFILE_URL} {google-plus#YOUR_SOCIAL_PROFILE_URL} {pinterest#YOUR_SOCIAL_PROFILE_URL}

Author Name

Contact Form

Name

Email *

Message *

Powered by Blogger.
Javascript DisablePlease Enable Javascript To See All Widget